Senator jasóspirimderdiń júktiligi máselesi týrasynda: Bilmegen bolyp otyra beremiz be

ASTANA. KAZINFORM – Reprodýktıvti densaýlyq saqtaý salasyndaǵy jumysty ulttyq deńgeıde júıeleý jáne balalar men jasóspirimder arasynda tıisti aǵartý jumystaryn kúsheıtý kerek.

Нұртөре Жүсіп
Фото: Сенаттың баспасөз қызметі

Senator Nurtóre Júsip osy másele týraly depýtattyq saýal joldady.

Depýtattyń málimetinshe, sońǵy bes jylda jasóspirimder arasynda týý kórsetkishi shamamen 1,5 esege artqan.

«Bul endi pandemııa kezinde bastalǵan eken. Keıingi tórt jylda bul úrdis bir deńgeıde saqtalyp kele jatyr. 2023 jyly qarshadaı qyzdar arasynda 5 094 bosaný faktisi tirkelip otyr. Bul sol kezeńdegi jalpy týý kórsetkishiniń 1,3 paıyzyn quraıdy. Imandylyqtyń uıasy dep esepteletin aýyldyq jerde eki ese artyp otyr... Jap-jas qyzdardy qorlaý da kóbeıdi, tipti zorlaý kóbeıdi. Bul jaǵdaı da erte júktilikke ákeledi. Biraq kóbinese mundaı oqıǵalar jabýly kúıinde qalyp, qyzdar ishinen tynyp qalady. Kórsek te kórmegen bolyp, bilsek te bilmegen bolyp osylaı otyra beremiz be?!», - dedi N. Júsip Úkimet basshysynyń atyna joldaǵan saýalynda.

Senator bul máselege kóz juma qaraýǵa bolmaıtynyn atap ótti. Sońǵy jyldardaǵy jaǵdaı barlyq múddeli taraptardyń, ásirese bilim berý jáne densaýlyq saqtaý salalary ókilderiniń máselege belsendi aralasýyn talap etedi.

«Biz bul problemaǵa aıryqsha nazar aýdarmaı bolmaıdy. Bul óte názik áleýmettik másele. Bala kóteretin jasqa kelgen qazirgi jasóspirimderdiń reprodýktıvti densaýlyq jaǵdaıy aldaǵy 10-15 jyldaǵy týý men demografııaǵa tikeleı áser etetini anyq. QR Oqý-aǵartý, Densaýlyq saqtaý, Eńbek jáne halyqty áleýmettik qorǵaý mınıstrlikteriniń, sondaı-aq osy salada jumys isteıtin halyqaralyq uıymdardyń qatysýymen jasóspirimder arasynda júktilik pen týý sanynyń ósý sebepterine vedomstvoaralyq taldaý júrgizý qajet. Kámeletke tolmaǵandardyń quqyqtaryn qorǵaýǵa qatysty zańnamanyń oryndalýyna monıtorıng pen baqylaýdy kúsheıtý asa mańyzdy. Jasóspirimder men olardyń ata-analarynyń erte júktilik qaýpi, sondaı-aq kámeletke tolmaǵandardyń jaýapkershiligi men quqyqtary týraly habardar bolý deńgeıin arttyrýǵa baǵyttalǵan aqparattyq-túsindirý jumystaryn jedel qolǵa alý kerek», - dedi Nurtóre Júsip.

Osyǵan deıin mamandar jasóspirimder arasyndaǵy erte júktilik máselesin kótergen boatyn.

 

Сейчас читают