Senator: jańa Ata zań — eldiń uzaqmerzimdi damý strategııasyn aıqyndaıtyn qujat
ASTANA. KAZINFORM — QR Parlamenti Senatynyń depýtaty Bıbigúl Jeksenbaı L. N. Gýmılev atyndaǵy Eýrazııa ulttyq ýnıversıtetinde ǵylymı ıntellıgentsııa, jańa tehnologııalar jáne IT salasynyń ókilderimen kezdesti.
Kezdesý barysynda senator elimizde keńinen talqylanyp jatqan jańa Konstıtýtsııa jobasynyń mazmuny men mańyzyna toqtalyp, ony Ádiletti Qazaqstan qurý jolyndaǵy qoǵamdyq kelisimniń kórinisi retinde baǵalady.
Óz sózinde B. Jeksenbaı jahandyq geosaıası jáne geoekonomıkalyq ózgerister jaǵdaıynda Qazaqstannyń saıası júıesin jańǵyrtý qajettigin atap ótti. Onyń aıtýynsha, jańa Ata zań — eldiń uzaqmerzimdi damý strategııasyn aıqyndaıtyn, táýelsizdik pen turaqtylyqty nyǵaıtatyn qujat.
Senator jańa Konstıtýtsııanyń basty qundylyǵy — adam ekenin erekshe atap ótti.
— Jobaǵa sáıkes adam quqyqtary men bostandyqtary memlekettiń eń joǵary qundylyǵy retinde bekitiledi. Ómir súrý quqyǵynyń absolıýttik sıpaty, sóz jáne shyǵarmashylyq erkindigi, jeke ómirge qol suqpaýshylyq, tsıfrlyq keńistiktegi quqyqtardy qorǵaý, ólim jazasyna tolyq tyıym salý sııaqty normalar naqty quqyqtyq kepildiktermen qamtamasyz etiledi, — dedi ol.
Sonymen qatar, otbasyn qorǵaý, turǵyn úıge qol suqpaýshylyq jáne ekologııalyq jaýapkershilik máseleleri Konstıtýtsııalyq deńgeıde aıqyndalǵany aıtyldy.
B. Jeksenbaı Ulttyq quryltaıda kóterilgen bastamalardyń jańa Konstıtýtsııada júıeli túrde kórinis tapqanyn atap ótti. Atap aıtqanda, bilim, ǵylym jáne ınnovatsııany strategııalyq basymdyq retinde bekitý, tsıfrlandyrýdyń ınstıtýtsıonaldyq-quqyqtyq negizin qalyptastyrý, ulttyq biregeılik pen qoǵamdyq kelisimdi nyǵaıtý, azamattyq dıalog tetikterin keńeıtý máseleleri konstıtýtsııalyq normalarǵa engizilgen.
Kezdesý barysynda jańa basqarý modeline de nazar aýdaryldy. «Kúshti Prezıdent — yqpaldy Parlament — esep beretin Úkimet» tujyrymdamasy bılik tarmaqtarynyń tepe-teńdigin qamtamasyz etýge baǵyttalǵan. Halyq keńesiniń róli azamattyq qoǵam men memleket arasyndaǵy turaqty dıalog alańy retinde aıqyndalǵany aıtyldy.
Senatordyń aıtýynsha, jańa Konstıtýtsııa — tek quqyqtyq qujat emes, ol bilimge, ınnovatsııaǵa jáne adam kapıtalyna negizdelgen uzaqmerzimdi ulttyq damý modeliniń irgetasy.
Kezdesý sońynda qatysýshylar Konstıtýtsııalyq reformanyń mańyzy týraly pikir almasty.
Aldaǵy referendým el bolashaǵyna qatysty mańyzdy sheshim bolmaq. Sondyqtan senator qazaqstandyqtardy óz daýystaryn berýge shaqyrdy.
Aıta keteıik, 2026 jylǵy 15 naýryzda Qazaqstan Respýblıkasynyń Jańa Konstıtýtsııasynyń jobasy boıynsha respýblıkalyq referendým ótedi. Astana turǵyndary saılaý ýchaskeleri týraly aqparatty birneshe jolmen bile alady.