Senator Jambyl oblysyndaǵy birneshe kúrdeli qurylysqa qarjy bólinýine yqpal etpek
Senatordyń jumys sapary aldymen Shý aýdanyndaǵy «Tasótkel» sý qoımasynan bastaldy. Mundaǵy jóndeý jumystary baǵanyń qymbattap ketýine baılanysty toqtap turǵan bolatyn. Al, jóndeý jumystary keshikken saıyn sý qoıma irgesindegi aýyldarǵa keri áserin tıgizýde. Qurylysty tolyq aıaqtaý úshin taǵy qosymsha 1 mıllıard 200 mıllıon teńge kerek.
Sý qoımasynyń máselesimen jiti tanysqan senator «Qazsýshar» respýblıkalyq mekemesi oblystyq fılıaly dırektory Erlan Ótegenovke «Bul sý qoımanyń jóndeý jumystary aıaqtalǵan soń sizderdiń teńgerimderińizge ótedi. Nege janashyrlyq tanytpaısyzdar? Nege máseleni túsindirip, sheshý joldaryn kórsetip, usynys bildirmeısizder?», – dep, mundaǵy jumysqa kóńili tolmaǵanyn ańǵartty.
Munan soń Bekbolat Orynbekov «Amanat» partııasynyń Shý aýdandyq fılıalynda aýdandyq máslıhat depýtattarymen kezdesti. Senator jergilikti halyq qalaýlylaryna QR Parlamenti Senatynyń jumysyn jan-jaqty aıtyp ótip, máslıhat depýtattarynyń máselelerine qulaq túrdi.
Depýtat Bolat Nııazbekov ómirden ozǵan adamdardyń nesıesine jeńildik jasaý máselesin kóterse, halyq qalaýlysy Ulan Abýov «Aýyl amanaty» baǵdarlamasy úshin qujat ázirleýdiń qıyndyǵyna, bas merdigerlerdiń salǵyrttyǵynan qurylys jumystarynyń sońyna jetpeýi jıilep ketkenine toqtaldy.
Al depýtat, Shý aýdandyq máslıhatynyń tóraǵasy Jasulan Ábenov aýdandaǵy Ál-Farabı mektebiniń «saqaldy qurylysqa» aınalǵanyna alańdaýshylyq bildirdi. Bekbolat Orynbekov depýtattar kótergen máselelerdi Senat minberinen qozǵaýǵa daıyn ekenin jetkizdi.
Munan keıin senator «saqaldy qurylys» sanalǵan Ál-Farabı atyndaǵy orta mektebiniń qurylysyn baryp kórdi. Úsh jyldan beri júrip jatqan qurylysty alǵashqy merdigerleri orta jolda tastap ketip, olarmen búginde zań aıasynda sottasý jumystary júrip jatyr. Jobalyq-smetalyq qujatynda 750 mıllıon teńgege baǵalanǵan 300 oryndyq mektep qurylysyn aıaqtaý úshin áli 350 mıllıon teńge qajet. Senat depýtaty mektepti qyrkúıek aıynyń sońyna deıin bitirýdi aýdan ákimi Baqytjan Jánibekovke, tehnıkalyq qadaǵalaýshy Aıtýǵan Tileýlige tapsyryp, jumysty shıratý kerektigin eskertti.
Senator Shý aýdanynyń Balýan Sholaq aýylyndaǵy 60 shaqyrymǵa beton kanal salyp jatqan merdiger kompanııanyń jumysymen de tanysty.
Senatordyń issapary munan soń Moıynqum aýdanynda jalǵasty. Ol áýeli Aıdarly aýylyndaǵy 500 oryndyq orta mekteptiń kúrdeli qurylys jumystarymen tanysty. Quny 250 mıllıon teńgelik qurylysty «Dauren Builo» merdiger kompanııasy júrgizip jatyr. Aýdandyq bilim bóliminiń basshysy Jaıdar Jazyqbaevtyń aıtýynsha, «Aýyl – el besigi» baǵdarlamasy aıasynda qarjy bólingen qurylystyń jumystary mejelengen ýaqytpen kele jatyr.
Bekbolat Orynbekov atalǵan aýylda salynyp jatqan sport kesheniniń qurylysyn da baryp kórdi. Bul qurylystyń jalpy quny 359 mıllıon teńgeni quraıdy. Merdiger kompanııa ókilderi qurylys jumystaryn qyrkúıek aıynyń sońyna deıin bitirýdi josparlap otyr. Sondaı-aq, senator Birlik aýylyndaǵy 1200 oryndyq Q.Rysqulbekov atyndaǵy orta mekteptiń kúrdeli jóndeý jumystarymen tanysty. Merdiger Dmıtrıı Idın mektep qurylysyn jyldam aıaqtap berýge kúsh salyp jatqandaryn aıtty.
Bul kúni B.Orynbekov Moıynqum aýdanyndaǵy kúrdeli jóndeý jumystary júrip jatqan ózge de birneshe qurylys nysanynyń jumysymen tanysty.
«Búgin Shý, Moıynqum aýdandarynda bolyp, máseleleri bar qurylys nysandaryn kórdim. Endi ol máselelerdiń sheshilýine kúsh salatyn bolamyz. Іssapar sońynda oblys ákimine kirip, turǵyndar tarapynan kóterilgen máseleler boıynsha aqyldasamyn. Sondaı-aq, Premer-Mınıstrge depýtattyq saýal joldap, Jambyl oblysyndaǵy birneshe kúrdeli qurylysqa jetkilikti qarjy bólinýine yqpal etsem dep otyrmyn», – dedi senator.
Buǵan deıin Jambyl oblysynda 14 mádenıet nysany, 23 sport kesheni salynatynyn jazǵan bolatynbyz.
