Senator J. Tóregeldınov kólikti mas kúıinde basqarǵandardy qylmystyq jaýapkershilikke tartýdy usyndy
ASTANA. 15 qarasha. QazAqparat -Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Jumabek Tóregeldınov jol qozǵalysy tártibin buzýshylar úshin jaýapkershilikti qataıtý máselesin kóterdi.
«Sońǵy ýaqytta jol-kólik oqıǵasy elimizde jıilep ketti. Máselen, bir ǵana Almaty qalasynyń ózinde qazan aıynda jol-kólik oqıǵasy saldarynan 30 adam kóz jumǵan. Osyǵan oraı, biz Úkimet basshysynan jol-kólik oqıǵalaryna qatysty jaýapkershilikti aıtarlyqtaı qatańdatýdy suraımyz», - dedi J. Tóregeldınov.
Atap aıtqanda, senator kólikke mas kúıinde otyryp, basqarýǵa qatysty jazany qylmystyq jaýapkershilikke deıin kóterýdi, belgilengen jyldamdyqtyń arttyrylýyna qatysty kólikti júrgizý quqyǵynan 2-5 jylǵa deıin aıyrýdy qarastyrý máselerin suraıdy.
«Osy eki másele joldaǵy ólimderge basty sebep bolyp otyr. Al qoldanystaǵy normalarǵa kelsek, olar 5-ten 20 aılyq eseptik kórsetkishke deıingi aıyppul sanktsııalaryn ǵana qarastyrady. Bul júrgizýshilerge kóp jaǵdaıda esh áser bermeıdi», - deıdi senator.
Sonymen qatar, depýtat ishki ister organdary qyzmetkerleriniń zańdy talap etýine qaramaı, kólik júrgizýdi toqtatpaǵandar úshin jazany qataıtýdy suraıdy. «Al qarsy baǵyttaǵy jolǵa shyqqany úshin júrgizýshi kýáliginen 12 aıǵa aıyrý, baǵdarshamnyń tyıym salynǵan belgisine qaramaı, odan ótýge qatysty aıyppuldardy 5 esege arttyrý qajet. Bundaı óreskel buzýshylyqtar jyl ishinde qaıta qaıtalansa, onda júrgizýshi quqynan 12 aıǵa deıin aıyrý usynylady. Al jol júrgizý kýáligi bolmaı, ony basqarǵandar 10 táýlikke deıin ákimshilik qamaýǵa alynsyn», - dedi depýtat J. Tóregeldınov.
