Senator J. Erǵalıev qazaq qyzdaryn shetelde oqytýdy shekteý máselesin kóterdi

Óz saýalynda Jabal Erǵalıuly sońǵy ýaqytta shet memleketterde bilim alyp jatqan qazaq qyzdarynyń taǵdyryna alańdaýly ekenin bildirdi. Onyń aıtýynsha, shetelderde bilim alyp jatqan qazaq qyzdarynyń túrli sebeptermen kisi qolynan qaza tabýy, basqa da jaısyzdyqtar men abyroısyzdyqqa ushyrap jatatyndyqtaryn da aqparat agenttikteri taratyp jatyr.

«Árıne, qyzdarymyzdyń qaı memleketke baryp bilim alamyn dese, ol ózderiniń quqy. Alaıda, óz qyzdarymyz ben qaryndastarymyz shet elge oqýǵa baryp, ol jerde qaza taýyp jatsa, odan qaldy qyzdarymyz kim kóringenge turmysqa shyǵyp ketip jatsa, ol eldigimizge syn emes pe?! Búgingi qyz balalarymyz erteńgi urpaǵymyzdyń analary emes pe?! Ultymyzdyń urpaǵyn dúnıege ákeletin de qazaq qyzdary emes pe?! Etegin jel kótermegen qyz balalarymyzdy shet elderge shashyratyp jiberetindeı jáne jat jurttyń azamattaryna suraýsyz kete berýine osynshalyqty beıǵam qaraıtyndaı biz kóp pe edik, at tóbelindeı ǵana halyq emespiz be?!  Elbasy aıtyp otyrǵan batystyń jasandy mádenıetiniń bizdegi etek alyp bara jatqan beıádep jáne túrli beıbastyqtarǵa osy bastan tyıym sala almasaq, erteń kesh bolýy múmkin», - deıdi J. Erǵalıev.

Osyǵan qatysty birqatar mysaldardy alǵa tartqan senator, qyzdardy shet memleketke oqýǵa jiberýdi meılinshe shektep, kerisinshe, olardyń óz elimizde tolyqqandy jáne osy zamanǵa laıyqty bilim alýlaryna jáne sol oqý oryndarynyń ózinde ulttyq otbasylyq qundylyqtardy meńgerip, tárbıe alýlaryna jaǵdaı jasaý qajettigin alǵa tartty. «Qazirgi ýaqytta Qazaqstanda qyz balalarǵa arnalǵan Almatydaǵy Qazaq qyzdar memlekettik ýnıversıteti  ǵana bar. Endigi arada qyz balalarymyz shet elde qandaı mamandyqtardy ıgerýge yntaly bolyp otyr, sony zerttep jáne Elbasynyń elimizdi ındýstrııalandyrý saıasatyn júzege asyrý úshin qandaı mamandar qajet, mine, sol qajetti mamandyqtar boıynsha bilim berý maqsatynda Astana qalasynda memlekettiń tolyq qamqorlyǵynda bolatyn qyz balalarǵa arnalǵan osy zamanǵy taǵy bir joǵary oqý ornyn ashýdy jón sanaıdy. Árıne, bul búgin, ne erteń sheshiletindeı másele de emes shyǵar. Alaıda, ulttyń uly murattarynyń biri retinde qyz balanyń taǵdyryn bárinen de joǵary qoıatyn bolsaq, Úkimettiń bir búıirinde osy bir máseleler jatsa eken deımin», - dedi depýtat.