Senator zeınetaqy jınaǵyn tóleý kezindegi salyqty joıýdy usyndy

Senator Bekbolat Orynbekov óziniń depýtattyq saýalynda zeınetaqy jınaǵyn tóleý kezinde jeke tabys salyǵyn (JTS) ustaýdy joıý týraly máseleni qaraýdy usyndy, dep habarlaıdy Kazinform. 

Depýtattyń aıtýynsha, BJZQ-dan zeınetaqy tólemderine qazir 10% jeke tabys salyǵy salynady. Azamattar óz jınaqtarynyń bir bóligin qazir turǵyn úı satyp alý nemese emdelý úshin paıdalana alady. Bul rette, aqsha alǵan kezde birden nemese zeınetkerlik jasqa tolǵannan keıin aı saıyn teń úlespen salyq tólegennen keıin júzege asýy tıis.

«BJZQ-dan jasyna baılanysty zeınetaqy tólemderi men arnaıy áleýmettik tólemder turǵyn úı jaǵdaıyn jaqsartý, emdelýge aqy tóleý maqsatynda birjolǵy zeınetaqy tólemin alý kezinde týyndaıtyn keıinge qaldyrylǵan JTS somasyna túzetilýi tıis. Osy túzetýdiń saldarynan zeınetaqy tólemi mólsheriniń edáýir azaıý qaýpi bar. Al keıbir jaǵdaıda onyń mólsheri eń tómengi zeınetaqy mólsherinen de az bolady. Munyń bári zeınetaqy tólemderin alýshylar jaǵynan áleýmettik shıelenis pen narazylyqtyń týyndaýyna ákelýi múmkin», - dedi Bekbolat Orynbekov.

Senator osyǵan baılanysty óz usynysyn joldady. Olardyń bastysy – zeınetaqy jınaǵyn tóleý kezinde jeke tabys salyǵyn ustamaý.

«BJZQ-dan zeınetaqy tólemi zeınetkerler men Qazaqstan halqy úshin áleýmettik mańyzdy másele sanalady. Osy rette, zeınetaqy tóleminen salyq túrin ustap qalý zeınetaqy somasyn azaıtady, bul qazirgi naryqtyq jaǵdaıda aıtarlyqtaı mańyzdy másele. Sebebi zeınetaqy qorynan túsetin tólemder – zeınetkerler úshin negizgi tabystyń biri. Bul turǵyda bolashaq zeınetkerlerdiń ál-aýqatyna oń yqpal etý maqsatynda barlyq zeınetaqy jınaǵyn tóleý kezinde JTS ustap qalýdy joıý týraly máseleni qaraý usynylady», - dedi senator.