Senator Zerendidegi tarıhı-ólketaný murajaıy qurylysyndaǵy problemany atady
ASTANA. KAZINFORM — Senator Talǵat Júnisov óziniń depýtattyq saýalynda Zerendidegi kreatıvti jáne týrıstik ortalyqtyń negizi sanalatyn tarıhı-ólketaný murajaıynyń qurylysyn qarjylandyrý máselesine nazar aýdardy.
Depýtat bul joba Ornyqty damý maqsattarynyń 11-shi baǵyty aıasynda Aqmola oblysynyń Zerendi aýdanynda júzege asyp jatqanyn habarlady. Joba mádenı murany saqtaý, jańasha ındýstrııalardy damytý jáne týrısterdi qoldaý úshin kópfýnktsıonaldy keńistik qurýdy kózdeıdi. Bul rette, aýdannyń «Býrabaı» jáne «Shalqar» kýrorttyq aımaqtary arasynda ornalasýy nysandy týrıster úshin tartymdylyq núktesi retinde qarastyrýǵa múmkindik beredi.
Senator jobanyń jalpy quny 1 mlrd 170 mln teńge bolǵan kezde ony iske asyrýǵa 200 mln teńge bólingenin, bul rette qarjylandyrý tapshylyǵy 878 mln teńge bolatynyn atap ótti.
— Qazirgi ýaqytta qarjylandyrýdyń bolmaýyna baılanysty jobany iske asyrý is júzinde toqtatyldy. Jobany qarjylandyrý maqsatynda 2025 jyly Aqmola oblysynyń ákimdigi Ulttyq ekonomıka mınıstrligine birneshe ret bıýdjettik ótinim joldady. Alaıda, atalǵan ótinimder bıýdjet qarajatynyń tapshylyǵyna baılanysty qoldaý tappady. Aqmola oblysynyń sýbventsıonaldyǵyn jáne oblystyq bıýdjettiń shekteýli múmkindigin eskeretin bolsaq, joba áleýetti uzaq merzimdi qurylysqa aınalatyndaı. Joǵaryda aıtylǵandardyń negizinde Zerendi aýylyndaǵy vızıt-ortalyqpen biriktirilgen tarıhı-ólketaný murajaıynyń qurylysyn aıaqtaý úshin bıyl Arnaýly memlekettik qordan qarajat bólýge járdem kórsetýdi suraımyz, — dedi Talǵat Júnisov Úkimet basshysynyń atyna joldaǵan saýalynda.
Aıta keteıik, buǵan deıin Zerendide balalar men jasóspirimder sport mektebi ashylǵanyn jazǵan edik.
