Senator «VKontakte» áleýmettik jelisin jaýyp tastaýdy usyndy
ASTANA. QazAqparat - «VKontakte» áleýmettik jelisindegi jaýapkershilikti barynsha qataıtý, qajet bolsa jaýyp tastaý tetikterin jasaý kerek. Búgin Parlament Senatynyń jalpy otyrysynda eldegi dinı ahýalǵa qatysty másele kótergen senator Murat Baqtııaruly osylaı málim etti.
«Bizdiń dinı ustanymymyz el birligi bolýy tıis. Olaı bolsa, elimizdegi dástúrli emes jat aǵymdardy shekteıtin batyl saıası sheshim, quqyqtyq retteý, aqparattyq túsindirý men ǵylymı saraptaý, qoǵamdyq dinı oı salalaryna tujyrymdar tez arada jasalýy tıis. Máselen, Ózbekstan, Tájikstan sekildi baýyrlas elder tájirıbesinde olar óz táýelsizdikterine qaýip tóndiretin dástúrli emes barlyq dinı aǵymǵa áldeqashan zańdy shekteý qoıǵan», dedi senator.
Ol saýatty ımamdar daıarlaý, olardyń biliktiligin arttyrý arqyly ımamdardyń tek dinı emes, zaıyrly bilim úırenip, sheshendigi, kelbeti, júris-turysy kórkem minezdiligine mán berilýi kerektigin atap ótti.
«Elimizdegi dástúrli dinimizge kóleńke túsiretin saıttardyń, ásirese «VKontakte» áleýmettik jelisindegi jaýapkershilikti barynsha qataıtý, qajet bolsa jaýyp tastaý tetikterin jasaý kerek. Elimizdiń qaýipsizdigine nuqsan keltiretin radıkaldy dinı aǵymdaǵy kózqarasty myǵym ustanyp, ony nasıhattap júrgen azamattardy memlekettik qurylym, orta jáne arnaýly oqý oryndaryna, buqaralyq aqparat quraldarynda jumys isteýine tyıym salý kerek», dedi M. Baqtııaruly.
