Senator: Ulttyq jańǵyrýdyń basymdyqty baǵyttarynda ulttyq sport oıyndary da turýǵa tıis
ASTANA. QazAqparat - Búgin QR Parlamenti Senatynyń jalpy otyrysynda senator Jabal Erǵalıev ulttyq sport oıyndarynyń túrleri boıynsha Qazaqstan olımpıadasyn uıymdastyrýdy usyndy, dep habarlaıdy QazAqparat.
«Biz búgingi jáne keleshektegi ózimizdiń ár isimiz ben ár oıymyzdy, ıdelogııamyz ben saıasatymyzdy Elbasynyń «Bolashaqqa baǵdar: rýhanı jańǵyrý» tereń oıly eńbeginde aıtylǵan qaǵıdattarmen baılanystyra bilýimiz kerek dep sanaımyz. Osy oraıda aldaǵy ýaqytta myna bir jaılarǵa nazar aýdarǵandy jón dep taptyq: ulttyq jańǵyrýdyń endigi basymdyqty baǵyttarynda bizdiń ulttyq sport oıyndary da turýǵa tıisti bolsa kerek. Óıtkeni ulttyq sport ta ulttyq sanany, ulttyq rýhty qalyptastyrýdyń ulttyq kody bolyp sanalatyndyǵyn da umytpaǵanymyz abzal. Árıne, zań jobasynda Ulttyq olımpıadalyq komıtetiniń rólin kúsheıtý, Olımpıada sport túrleri boıynsha talantty sportshylardy daıarlaýdy jaqsartý ustanymynyń kórinis tabýy da jón, óte oryndy. Alaıda ultyq sport oıyndarymyzdyń bári birdeı olımpıadalyq oıyndar qataryna enýi de múmkin emes. Bul talas týdyrmaıtyn másele. Sondyqtan ulttyq sport oıyndary boıynsha Qazaqstannyń óz olımpıadasy bolǵany durys»,-dedi Jabal Erǵalıev «Dene tárbıesi jáne sport máseleleri boıynsha QR-dyń birqatar zańnamalyq aktilerine ózgertýler men tolyqtyrýlar engizý týraly» zań jobasyn talqylaý barysynda.
Osy oraıda depýtat elimizde ulttyq sport oıyndaryn damytýdaǵy nasıhattaý sharalary jetkiliksiz ekenin atap ótti.
«Negizinen, ulttyq sport oıyndarymen aınalysatyn aýyl balalary men jastary. Sol aýyldyń balalary men jastary keı jaǵdaıda ulttyq sport túrlerinen ótkiziletin jarystarǵa baratyn qarjy men kólik taba almaı qınalyp jatady. Qazaqstanda ulttyq sport oıyndarynyń jeńimpazdary men chempıondarynyń jetistikterin de eshkim bile bermeıdi. Olar dáriptelmeıdi, aıtylmaıdy, nasıhattalmaıdy»,-dedi Erǵalıev.
Bul turǵyda depýtat aldaǵy ýaqytta elimizde ulttyq sport oıyndarynyń túrleri boıynsha Qazaqstannyń olımpıadasyn asa mártebeli jaǵdaıda ótkizilýin qarastyrýdy usyndy.
«Dene tárbıesi jáne sport máseleleri boıynsha QR-dyń birqatar zańnamalyq aktilerine ózgertýler men tolyqtyrýlar engizý jónindegi» zań jobasy eki oqylymda talqylanyp, qabyldandy.
