Senator ulttyq elektrondyq balalar kitaphanasy portalyn ashýdy usyndy

NUR-SULTAN. QazAqparat – QR Parlamenti Senatynyń depýtaty Rysqalı Ábdikerov QR Premer-Mınıstri Asqar Mamınge depýtattyq saýal joldady. Onda senator elimizdiń Mádenıet jáne sport mınıstrligi 2007 jyly memlekettik baǵdarlama aıasynda ashqan Qazaqstan ulttyq elektrondyq kitaphanasy kazneb.kz portalyndaǵy tsıfrlandyrylǵan elektrondyq kitaptardyń sapasyn synǵa aldy, dep habarlaıdy QazAqparat.

Ondaǵy elektrondyq kitaptardyń 3D nusqasyn oqý qıynǵa soǵady, mátinderi anyq emes, bulyńǵyr, keıbir aýdıo-kitaptar múldem ashylmaıdy. Qazirgi ýaqytta portaldyń segmenti ádebıettiń 60 myńnan astam elektrondyq kóshirmesin qamtıdy. Onyń ishinde balalarǵa arnalǵan elektrondyq kitaptar sany 5 551 danany qurap otyr. Degenmen, búginde Qazaqstanda shyǵatyn barlyq basylymdardyń elektrondyq nysany kazneb.kz portalynda jarııalanbaı otyr. Máselen, Bilim jáne ǵylym mınıstrligi shyǵaratyn mektep pán kitaptarynyń elektrondyq nusqalary tolyqtaı qamtylmaǵan.

Búginde elimizdiń kitaphana qorynda jalpy 112 mıllıonnan astam basylym bar, al olardyń tek 1,5 mıllıonǵa jýyǵy ǵana elektrondyq nusqada. Bul – kitaphana qorynyń jalpy kóleminiń nebári 1,3 paıyzyn qurap otyr. Respýblıka boıynsha 3 940 kitaphananyń 1 892-si, ıaǵnı 48 paıyzy ǵana ınternet jelisine qosylǵan. Bul árıne jetkiliksiz, ásirese, qazirgi qashyqtan oqytý jaǵdaıynda. Sondyqtan, balalarǵa arnalǵan jeke Qazaqstan Ulttyq elektrondyq balalar kitaphanasy portaly ashylsa – nur ústine nur bolar edi.

«Osyǵan oraı, «Kitaphana isi týraly» zań jobasyn ázirleýdi; Balalarǵa arnalǵan Qazaqstan Ulttyq elektrondyq balalar kitaphanasy portalyn ashýdy; Qazaqstanda basylyp shyǵarylatyn barlyq jarııalanymdardyń mindetti danasynyń elektrondyq nysanyn kazneb.kz portalyna joldaý boıynsha naqty júıesin qalyptastyrýdy; Kitaphanalardy Braıl qarpi, úlkeıtilgen qarip, sondaı-aq zamanaýı tsıfrlyq jáne DEIZI (DAISY) nysanyndaǵy kitaptarmen jetkilikti túrde qamtamasyz etýdi qarastyrýyńyzdy ótinemiz», – dedi senator.