Senator Úkimetti jylyjaı sharýashylyǵyn qoldaýǵa shaqyrdy
Osy oraıda senator Túrkistan oblysy Saryaǵash aýdany turǵyndarymen kezdesýi kezinde jurtshylyq kótergen máselelerdi jetkizdi.
«Búgingi tańda respýblıkada 1 265 gektar jylyjaıdyń 844 gektary Túrkistan oblysynda ornalasqan. Olar jyl saıyn 91 myń tonna kókónis óndirip, el turǵyndaryn qamtamasyz etip otyr. Jylyjaılarda 12 myńnan astam sharýa qojalyqtary eńbek etip jatyr. Túrkistan oblysynda óndiriletin ónimniń 66% Saryaǵash aýdanynda ósedi. Ol aýdannyń jalpy ishki óniminiń 30% quraıdy. Búginde jylyjaı óndirisi óńir aýyl sharýashylyǵynyń negizin quraıtyn, halyqty sapaly kókónispen qamtamasyz etip otyrǵan, syrttan keletin ımporttyq ónimderge tótep bere alatyn salaǵa aınalyp keledi. Sondyqtan bul salany qoldaý - elimizdiń ishki naryǵyn jáne azyq-túlik qaýipsizdigin qamtamasyz etý», - dedi Álı Bektaev
Depýtattyń aıtýynsha, osy salanyń damýyna teris áser etetin negizgi faktor – kommýnaldyq qyzmetterdiń joǵary quny. Osy oraıda ımporttyq kókónisterdiń baǵasy tómen bolǵandyqtan, olar satyp alýshylar úshin tartymdy bolyp tur. Sonymen qatar, qysqy jaǵdaıda jylyjaı sharýashylyǵynyń áleýmettik mańyzyn eskere otyryp, olarǵa da qosymsha kómir bólý qajet.
Senator qazirgi tańda jylyjaı óndirisine qatysty memlekettik qoldaýdy kúsheıtý qajet ekenin aıtty.
«Ásirese, kóshet ósirip, olardy egip, ónim alyp jatqan jylyjaılardy memlekettik qoldaý óte mańyzdy. Sondyqtan tuqymǵa, kóshetke, kommýnaldyq shyǵyndardy tómendetýge arnalǵan qosymsha qarjy tetikteri qaralýy kerek. Jylyjaımen aınalysatyn taýar óndirýshilerdi jeńildetilgen nesıelermen qamtamasyz etý de asa mańyzdy. Jylyjaı óndirisin qoldaý jáne damytýǵa qatysty problemalardy Úkimet deńgeıinde arnaıy qarap, keshendi sheshimder qabyldaý qajet dep esepteımiz», - dedi Á. Bektaev.
