Senator Úkimetten keme jasaýǵa qosymsha qarjy bólýdi surady
ASTANA. QazAqparat - Senattyń jalpy otyrysynda depýtat Ǵumar Dúısembaev UQK Shekara qyzmeti úshin qajetti shaǵyn kúzet kemesi qurylysyna tıisti qarjy qarastyrýdy surady, dep habarlaıdy QazAqparat.
«Elimizdiń Kaspıı teńizi arqyly ótetin Batys aımaqtaǵy shekaranyń qaýipsizdigin qamtamasyz etýde áskerı-teńiz kúshterin tehnıkalyq jabdyqtaý úshin keme jáne júırik qaıyqtar jetkilikti mólsherde bolýy qajet ekeni aıqyn. Sonymen qatar, jalpy Kaspıı óńiriniń memleketimizdiń tranzıttik kóliktik-logıstıka turǵysynan halyqaralyq mańyzy bar. Búginde otandyq áskerı kemeler jasaıtyn ári kúsh qurylymdarǵa qajetti ónimder shyǵaratyn «Oral «Zenıt» zaýyty» AQ-nyń memlekettik qorǵanystyq tapsyrys aıasynda elimizdegi tapsyrystardy oryndaýǵa barlyq múmkindikteri bar», - dedi depýtat Úkimet basshysy Baqytjan Saǵyntaevtyń atyna joldaǵan saýalynda.
Osy oraıda ol zaýyt shaǵyn kúzet kemesi «Aıbar» jobasyn jasaýǵa ázir ekenin jetkizdi. Atalǵan másele boıynsha zaýyt basshylyǵynan bıylǵy respýblıkalyq bıýdjettiń 2018-2020 jyldarǵa qosymsha qarjylandyrý lımıtine UQK Shekara qyzmetin qosý týraly ótinish keldi.
«Bul turǵyda 2018-2020 jyldarǵa respýblıkalyq bıýdjetti naqtylaý kezinde qosymsha qarjylandyrýdyń lımıtinde Ulttyq qaýipsizdik komıtetin qosý, sonda ı-aq 2018 jyly shaǵyn kúzet kemesi negizin qurýǵa qajetti 500 mln teńge kóleminde qarjy bólý múmkindigin qarastyrýdy suraımyz», - dedi Ǵumar Dúısembaev.
