Senator: Úkimet sýmen qamtýǵa bólinetin qarajatty qadaǵalaýdy kúsheıtý kerek
NUR-SULTAN. QazAqparat – Parlament Senatynyń Halyqaralyq qatynastar, qorǵanys jáne qaýipsizdik komıtetiniń múshesi Qaırat Qojamjarov Úkimet halyqty sýmen qamtýǵa bólinetin qarajatty qadaǵalaýdy kúsheıtý kerektigin atap ótti, dep habarlaıdy QazAqparat tilshisi.
«Qaraǵandy oblysynda «Jáırem-Qarajal» toptyq sý qubyrynyń tartylyp jatqanyna 10 jyl boldy. Alaıda jobalaýdyń durys bolmaı, qurylystyń sapasyz júrgizilýine baılanysty ol paıdalanýǵa berilmegen. Onyń ústine nysannyń qurylysy 830 mln teńgeden 6,7 mlrd teńgege deıin, ıaǵnı 8 ese qymbattaǵan. Mundaı jaǵdaılar Pavlodar oblysynda da (quny 5,5 mlrd teńge sý qubyry), Túrkistan óńirinde de (1,5 mlrd teńge - magıstral arnasy), Jambyl oblysynda da (550 mln teńge - Talas sý qoımasy men magıstraldy arna) tirkelip otyr», - dedi Qaırat Qojamjarov Senat otyrysynda.
Senator Qazaqstan Prezıdentiniń Joldaýy aıasynda aldaǵy úsh jylda halyqty sýmen qamtý úshin 250 mlrd teńge bólinetinin jetkizdi.
«Buǵan qosa Qazaqstannyń 4 oblysyndaǵy ırrıgatsııalyq jelilerdi qalpyna keltirý úshin 250 mln dollardy, ıaǵnı 97 mlrd teńgeni Úkimettiń kepilimen Azııa damý banki berip otyr. Osy qarajat arnalardy tazartýǵa, jóndeýge, sý tartýǵa, 4 myńǵa tarta gıdrotehnıkalyq qurylymdardy qaıta jóndeýge jumsalady. Bul rette Úkimet sýmen qamtýǵa bólinetin qarajatty qadaǵalaýdy kúsheıtý kerek», - dedi Qaırat Qojamjarov.
