Senator: Terrorızmge arandatýshylarǵa da ólim jazasyn qoldaný kerek
«Ondaı adamdardy atý kerek. Búgingi Qylmystyq kodekske terrorızm úshin ǵana emes, ony uıymdastyryp, adamdy ondaı áreketke ıtermelegeni úshin de ólim jazasyn engizý kerek. Nege? Sebebi terrorlyq aktini jasaıtyndar ol - oryndaýshylar ǵana. Olardyń mıyn aınaldyryp, terrorızmge barýǵa ıtermeledi. Ol úshin uıymdastyrýshylardy atý kerek», - deıdi S.Aqylbaı.
Senatordyń aıtýynsha, radıkaldy ıdeıalarǵa boı aldyryp ketetinder óz balalaryn tastap, qylmysqa baryp jatady. Al olardyń artynda arandatýshylar bar. Solarǵa qatysty jazany kúsheıtse, dinimizge jat aǵymdardy nasıhattaıtyndardyń sanyn azaıtýǵa bolatyn edi.
«Qazirgi kezde Qytaıda, Saýd Arabııasynda ondaı jaza qarastyrylǵan. Amerıka shtattarynyń basym bóliginde terrorızmge ıtermelep, arandatýshylyq jasaǵany úshin ólim jazasy qoldanylady», - dep atap kórsetti senator.
Aıta keteıik, ótken aptada Almatydaǵy atysta 10 adamnyń ómirin qıǵan Rýslan Kúlekbaev ólim jazasyna kesildi. Alaıda Qazaqstanda osy sanattaǵy jazaǵa moratorıı jarııalanǵan. «Prezıdent jarlyǵyna sáıkes,elimizde ólim jazasyna qatysty sot sheshimderin iske asyrý toqtatyldy. Alaıda zań boıynsha sýdıalarǵa ondaı sheshim shyǵarýǵa shekteý joq. Sońǵy ret Qazaqstanda adamdy ólim jazasyna kesý týraly sheshim on jyl buryn, 2006 jyly shyǵarylǵan bolatyn», - delingen Bas prokýratýranyń resmı habarlamasynda.
Qazaqstanda ólim jazasyna moratorıı jarııalaý týraly jarlyq 2003 jyly jeltoqsan aıynda kúshine engen bolatyn. Moratorııdiń merzimi sheksiz. Alaıda ol kez kelgen ýaqytta alynyp tastalýy múmkin. Osyǵan baılanysty ólim jazasyna kesilgen azamattar túrmede ustalady.
