Senator tegin medıtsına men bilimniń bolashaǵy týraly aıtty
ASTANA. KAZINFORM — Qazaqstan tarıhı mańyzy bar saıası naýqan — respýblıkalyq referendým aldynda tur. Ata Zańǵa engiziletin túbegeıli ózgerister, adam quqyǵynyń qorǵalýy jáne áleýmettik kepildikter týraly QR Parlamenti Senatynyń depýtaty Bıbigúl Jeksenbaı «Jibek Joly» telearnasynyń stýdııasynda keńinen tarqatyp aıtyp berdi.
Senatordyń aıtýynsha, bul jolǵy konstıtýtsııalyq reformanyń basty ereksheligi — preambýladan bastap adam jáne onyń quqyqtarynyń birinshi kezekke shyǵýy. Sondaı-aq memlekettiń myńjyldyq tarıhy men bolashaqqa baǵdarlanǵan ınnovatsııalyq damý baǵyty da Ata Zańda nyq kórsetilmek.
— Bul referendým — halyqtyń óz únin estirtýine, memleket basqarý isine tikeleı aralasýyna berilgen úlken múmkindik. Biz preambýlaǵa Qazaqstannyń ejelden kele jatqan tarıhyn kirgizdik. Sonymen qatar 21 ǵasyrdyń suranystaryna oraı, tsıfrlyq jáne ınnovatsııalyq damý máselelerin de konstıtýtsııalyq deńgeıde bekitip otyrmyz, — deıdi Bıbigúl Jeksenbaı.
Reformanyń taǵy bir mańyzdy tusy — Parlamenttiń rólin kúsheıtý jáne Halyq keńesin qurý arqyly azamattyq qoǵamnyń belsendiligin arttyrý. Endi kez kelgen belsendi azamat máslıhattar men qoǵamdyq uıymdar arqyly memlekettik basqarý protsesine usynys bere alady.
Alaıda mańyzdy naýqan qarsańynda halyq arasynda túrli jalǵan aqparattar men túsinispeýshilikter de týyndap otyr. Ásirese áleýmettik jelilerde «medıtsına men bilim aqyly bolady» degen feık vıdeolar tarap jatyr.
— Halyq arasynda bilim men medıtsınaǵa qatysty túsinispeýshilik bar. Medıtsına jáne orta bilim tegin bolyp qalady, feıkterge senbeńizder. Bul — memleket tarapynan beriletin konstıtýtsııalyq kepildik. Sondaı-aq otbasylyq qundylyqtar men áıelder quqyǵyn qorǵaý máselesi de basty nazarda. Qyz alyp qashý sııaqty qısyq dástúrlerge tosqaýyl bolatyn konstıtýtsııalyq tetikter qarastyrylǵan. Ana men balanyń quqyǵy Ata Zańmen qorǵalady, — dep túsindirdi depýtat.
Referendýmǵa daıyndyq jumystary qyzý júrip jatyr. Depýtattyń aıtýynsha, halyqtyń saıası saýattylyǵy men belsendiligi Bul joly burynǵydan áldeqaıda joǵary.
Aıta keteıik, qazaqstandyqtar 15 naýryz kúni 10402 ýchaskede daýys bere alady.