Senator Taldyqorǵanda áskerılerdi áleýmettik qoldaý máselesin talqylady
ASTANA. KAZINFORM - Senat depýtaty Ǵalıasqar Sarybaev Taldyqorǵan qalasynda «Ardagerler uıymy» respýblıkalyq qoǵamdyq birlestiginiń, Qoǵamdyq keńestiń ókilderimen jáne máslıhat depýtattarymen kezdesti.
Onda Senattyń zań shyǵarý qyzmeti, jergilikti depýtattarmen ózara is-qımyl, sondaı-aq óńirdegi ózekti máseleler talqylandy. Sarybaev óńirdegi máselelerdi sheshýde máslıhat depýtattary men qoǵamdyq keńes músheleri róliniń mańyzdylyǵyn atap ótti.
Senator Sarybaev jańadan salynǵan «Jetisý Arena» sport kesheninde boldy jáne voleıbol men ústel tennısine arnalǵan oqý-jattyǵý keshenderiniń qurylysymen tanysty. Tapsyrys berýshilermen jáne merdigerlermen kezdesý barysynda qurylysty ýaqtyly jáne sapaly aıaqtaý sportshylardyń jaqsy jattyǵýyna, óńirge kásibı bilikti jattyqtyrýshylardyń kelýine jáne osynda qonystanýyna yqpal etetinin atap ótti.
Ǵalıasqar Sarybaev osy óńirde ornalasqan 5514 áskerı bólimde de boldy. Onda áskerı qyzmetshilerdiń qyzmet etý jáne turmys jaǵdaıymen, oryn almastyrý josparlanyp otyrǵan jańa aýmaqtaǵy nysandar qurylysymen, sondaı-aq áskerı tehnıka, atys qarýy men jabdyqtardyń úlgilerimen tanysty.
Kezdesý barysynda jaýyngerlik daıyndyqty arttyrý, qajetti jabdyqtarmen qamtamasyz etý jáne áskerı qyzmetshiler men olardyń otbasylaryn áleýmettik qoldaý máseleleri talqylandy. Sondaı-aq áskerı qyzmet jaǵdaıyn jaqsartý, oqytý, kásibı damý jáne bilim berý granttaryn berý taqyryptary qozǵaldy.
Senator Sarybaev ulandarǵa adal qyzmeti úshin alǵysyn bildirip, olardyń óńirdiń qaýipsizdigi men turaqtylyǵyn qamtamasyz etýdegi róliniń mańyzdylyǵyn atap ótti.
