Senator Taǵymov Aqtóbe oblysyndaǵy kásiporyndardy aralady
ASTANA. QazAqparat - Parlament Senaty depýtattarynyń aımaqtarǵa sapary odan ári jalǵasýda.
Bul kúnderi senator Marat Taǵymov Aqtóbe oblysynda jumys babyndaǵy saparda júr. Depýtat oblys ortalyǵy men Alǵa aýdanynda jergilikti máslıhat depýtattarymen jáne jurtshylyqpen kezdesý ótkizdi.
M.Taǵymov «Aıbek» qalbyrlaý zaýytynda jáne Aqtóbedegi qalalyq jylyjaı sharýashylyǵynda boldy. Senator Alǵa aýdanyndaǵy «Nurly jol» baǵdarlamasy boıynsha qarjylandyrylǵan et óńdeý kesheni jáne «Alǵa jylý» KMK tazartý ǵımaratynyń jumysymen tanysty, sondaı-aq quqyq qorǵaý organdarynyń basshylyǵymen kezdesti. Eńbek ujymdarymen júzdesý barysynda aımaqtyń ekonomıkalyq órkendeýi men áleýmettik máselelerdi sheshý týraly áńgime órbidi.
Senator M.Taǵymov aldaǵy ýaqytta Mártók jáne Áıteke bı aýdandaryna barýdy josparlady.
