Senator: Tabysy tómen turǵyndardyń jaǵdaıyn jaqsartý – búgingi kúnniń basty mindeti
Onyń aıtýynsha, jumys oryndary kóptep ashylsa halyqtyń jaǵdaıy jaqsarady.
«Qazaqstan Prezıdenti Qasym-Jomart Toqaevtyń tóraǵalyǵymen jańadan jasaqtalǵan Úkimettiń keńeıtilgen otyrysynda 2021 jylǵy áleýmettik-ekonomıkalyq josparynyń qorytyndylary talqylandy. Jetistikter men kemshilikter saralanyp, barlyq másele jan-jaqty qaraldy. Prezıdent Úkimettiń qorytyndy esebi boıynsha kóptegen tapsyrma berdi. Áleýmettik ahýal men halyqtyń áleýmettik máselesi, halyqtyń tabysyna baılanysty birqatar mindetter alǵa qoıyldy.
Onyń ishinde halyqtyń tabysyndaǵy teńsizdikterge baılanysty aıtqan máseleleri óte oryndy ekeni aqıqat. Bizdiń elimizde 1 mıllıonnan astam adamnyń tabysy jańaǵy kedeıshilik deńgeıinen tómen bolyp shyqty. Jergilikti ákimderge aldaǵy ýaqytta jumys ornyn ashyp, halyqqa jaǵdaı jasaý, mıkro, kishi jáne orta bıznes ashýǵa tapsyrma berildi. Onyń ishinde 10 myń adamǵa jylyna 100 jumys ornyn ashý tapsyrmasy da mańyzdy bolyp otyr», - dedi D. Nóketaeva.
Onyń aıtýynsha, orta jáne shaǵyn bıznesti damytý arqyly halyqtyń ál-aýqatyn, tabysyn arttyrý, teńgerimsizdikti azaıtý máselesi sheshilýi tıis.
«Sondyqtan da muny shyn máninde de quptaımyz. Keıingi on jyldyń ishinde áleýmettik jaǵdaıy nasharlap ketken turǵyndardyń hal-ahýalyn jaqsartý – búgingi kúnniń basty mindeti bolyp otyr», - dedi senator.
