Senator sportshylardyń ýnıversıtetke túsý tártibin jeńildetýdi surady
NUR-SULTAN. QazAqparat - Senator Murat Baqtııaruly kolledjdi támamdaǵan sportshylardyń joǵary oqý oryndaryna túsý tártibin jeńildetýdi surady. Osy oraıda depýtat Parlament Senatynyń jalpy otyrysynda QR Premer-Mınıstriniń orynbasary Gúlshara Ábdiqalyqovanyń atyna depýtattyq saýal joldady, dep habarlaıdy QazAqparat tilshisi.
«Osy depýtattyq saýal joldaýymyzǵa elimizdegi óner jáne sport salasyndaǵy kolledjderde oqyp júrip, halyqaralyq deńgeıde joǵary jetistikke jetken túlekter joǵary oqý oryndaryna túsý barysynda keshendi testileýden tómen baǵa alyp, memlekettik suranys boıynsha berilgen oryndarǵa óte almaýlary negiz bolyp otyr. Qazaqstannyń halyqaralyq bedeline úlken úles qosyp kele jatqan sala - óner men sport. Bul eki salaǵa mamandar daıyndaýdyń ózindik ereshelikteri bar. Sebebi eki salaǵa da mamandar daıyndaý mektepten bastalady. Óner jáne sport salasyndaǵy arnaıy mektepterde 4-shi synyptan daıyndyq bastalyp, olar keıin óz bilimderin orta arnaıy oqý oryndary - kolledjderde, sonan soń joǵary oqý oryndarynda jalǵastyrady. Qazaqstandaǵy óner jáne sport salasyndaǵy úzdiksiz bilim berý júıesiniń qalyptasýynyń nátıjesinde biliktiligi joǵary mamandar ár túrli halyqaralyq baıqaýlar men jarystarda, olımpıadalarda eldiń namysyn qorǵap, joǵary jetistikterge jetýde», - dep toqtaldy senator.
Onyń sózine qaraǵanda, qazir elimizdegi óner salasyndaǵy 7 kolledjdi jyl saıyn 600-den astam túlek, al sport salasynda maman daıyndaıtyn 5 arnaıy koliedjde 200-ge jýyq túlek bitiredi. Jyl saıyn túlekterdiń 70 paıyzy joǵary oqý oryndaryna qujat tapsyrady.
«Alaıda sońǵy jyldary kolledj túlekteriniń joǵary bilim alýyna belgili bir kedergiler týyndaýda. Óner jáne sport salasyndaǵy kolledjderde oqyp júrip, halyqaralyq deńgeıde joǵary jetistikke jetken túlekter joǵary oqý oryndaryna túsý barysynda keshendi testileýden tómen baǵa alyp, memlekettik suranys boıynsha berilgen oryndarǵa óte almaı qalady. Atap aıtqanda, 2018 jyly "dene shynyqtyrý jáne sport" mamandyǵyna bólingen 450 grantqa 2 353 ótinish berildi. Ótinish bergenderdiń ishinde 1222 sportshy bolyp, baıqaý qorytyndysy boıynsha olardyń tek 107-si ǵana bilim grantyn aldy. Nátıjesinde, júzdegen sportshylar, ıanı ártúrli jarystardyń chempıondary men júldegerleri, halyqaralyq dárejedegi 11 sport sheberi, 50 sport sheberi jáne 300-den astam sport sheberine úmitker memlekettik granttan tys qaldy», - dedi M. Baqtııaruly.
Depýtattyń aıtýynsha, olardyń qatarynda Qazaqstannyń aldyńǵy qatarly sportshylary bar.
«Qurmetti Gúlshara Naýshaqyzy, joǵaryda atalǵandardy negizge ala otyryp arnaıy kolledjderdiń túlekterin óner men sport salasyndaǵy jetken tabystaryna sáıkes, keshendi testileýden bosatýdyń tetikterin qarastyrýyńyzdy suraımyz», - dedi senator.
