Senator soltústik jáne shyǵys óńirlerde halyq sanynyń kemýi máselesin kóterdi
ASTANA. KAZINFORM — Búgin Senattyń jalpy otyrysynda depýtat Amangeldi Tolamısov Qazaqstandaǵy demografııalyq saıasattyń ózekti máselelerin kóterdi
Senator qoldanystaǵy demografııalyq saıasat fragmentti jáne naqtylanbaǵan sıpatta ekenin atap ótti. Demografııa men kóshi-qondy basqarý fýnktsııalary ártúrli mekemeler arasynda shashyrańqy ornalasqan, bul júıeli taldaý, belsendi josparlaý múmkindigin joqqa shyǵarady. Sonyń saldarynan týý tómendedi jáne halyqtyń qartaıýy baıqaldy, aımaqtyq alshaqtyq, soltústik jáne shyǵys aımaqtardaǵy halyq sanynyń kemýi, sondaı-aq kóshi-qon aǵynynyń kóbeıýi jáne ýrbanızatsııanyń ósýi kórinis tapty. Bul qıyndyqtar basqarýdyń barlyq deńgeıinde jan-jaqty kózqaras pen úılesimdi kúsh-jigerdi qajet etedi.
— Bul syn-qaterlerdiń keshendiligi jeke bastamalardy emes, birtutas, vedomstvoaralyq úılestirilgen jáne ǵylymı negizdelgen tásildi qajet etedi. Tujyrymdama ómirlik tsıkldiń týǵannan bastap belsendi uzaq ómir súrýge deıingi barlyq kezeńdi qamtýǵa, aýmaqtyq saıasat, eńbek utqyrlyǵy, reprodýktıvti jáne kóshi-qondy josparlaýdy qamtýy tıis. Qazirgi konfıgýratsııada demografııalyq jáne kóshi-qon saıasaty úshin biryńǵaı jaýapty ortalyq joq ekenin atap ótkim keledi. Bul ókilettikterdiń bulyńǵyrlanýyna jáne basqarýdyń tómendeýine ákeledi. Osyny eskere otyryp, qoldanystaǵy memlekettik organdardyń birine normatıvtik deńgeıde tıisti fýnktsııalardy bekitip, keńeıtilgen úılestirý mandatyn berý nusqasyn qarastyrý usynylady, — dedi Amangeldi Tolamısov Úkimet basshysynyń atyna joldaǵan saýalynda.
Senator sonymen qatar demografııa salasyndaǵy ǵylymı-taldaý jumysyn damytýdyń mańyzdylyǵyn atap ótti. Demografııalyq jáne kóshi-qon protsesterin taldaýdyń ulttyq ortalyǵyn qurý áleýmettik ári ekonomıkalyq faktorlarmen qosa jan-jaqty taldaý júrgizýge, memlekettik saıasatty josparlaý úshin dálirek boljamdar jasaýǵa kómektesedi. Sonymen qatar, depýtat demografııalyq strategııany tıimdi iske asyrý úshin bilikti kadrlardy daıarlaýdy qamtamasyz etý qajet ekenin aıtty.
Eske salsaq, byltyr kúzde Premer-Mınıstr Oljas Bektenov Senat depýtattarynyń demografııa máseleleri boıynsha memlekettik organ qurýǵa qatysty saýalyna jaýap berdi.