Senator: Shahtadaǵy apatqa kináliler jeńil jazamen qutylmaýy kerek
Búgin Senattyń jalpy otyrysynda depýta Sergeı Ershov eldiń Premer-Mınıstr Álıhan Smaıylovtyń atyna joldaǵan depýtattyq saýalynda elimizdiń ónerkásip qaýipsizdigindegi júıeli máseleler týraly aıtty, dep habarlaıdy Kazinform.
Senatordyń aıtýynsha, «Arselor Mıttal» kásipornyndaǵy apattar júıeli túrde qaıtalanyp keledi. Qaıǵyly oqıǵalardyń negizgi sebepteriniń biri – eskirgen jabdyqty paıdalaný.
«ArselorMıttal Temirtaý» AQ jumys istegen jyldary kómir qabattaryn aldyn ala gazsyzdandyrý boıynsha jumystardy tıisti deńgeıde júrgizbegen, bul osyndaı qaıǵyly oqıǵalardyń basty sebebi. Ótken ǵasyrda shyǵarylǵan qural-jabdyqtar áli de qoldanylyp jatyr. Tozǵan jabdyq jumysshylardyń ómirine jáne densaýlyǵyna qaýip tóndiretini anyq. Qazir kóptegen ónerkásiptik kásiporyndardyń ıeleri jabdyqty aýystyrýǵa aqsha únemdep, ónerkásiptik qaýipsizdik saraptamasyn júrgizýmen shekteledi. Bul turǵyda óndiristerdiń qaýipsizdigin baǵalaýdyń obektıvtiligi úshin bul saladaǵy ýákiletti organǵa qaýipti óndiristik nysandardy jańartý men tehnıkalyq qaıta jaraqtandyrýdyń jıyntyq josparyn kelisý, sondaı-aq kásiporyndardyń ony ýaqtyly oryndaý jónindegi mindetin bekitý fýnktsııasyn berý oryndy dep sanaımyz», - dedi Sergeı Ershov.
Depýtat ónerkásip qaýipsizdigi salasyndaǵy tıisti qadaǵalaýdy óndiristik baqylaý qyzmetiniń mamandary atqaratynyn atap ótti. Bul qyzmetkerler anyqtaǵan kemshilikter erekshe nazarǵa alynbaıdy. Sebebi olar jeke óndiristik baqylaý qyzmetiniń mamany, ıaǵnı osy kásiporynnyń basqa qyzmetterinde jumys isteıdi.
«Qazirgi kezde qoǵamda atalǵan tragedııaǵa kináli adamdardy qylmystyq jaýapkershilikke tartý týraly másele ádil kóterilip otyr. Qaýpi joǵary salalarǵa qatysty memleket jaǵynan qatań baqylaý qajet. Osyndaı qaıǵyly oqıǵalarǵa kináli adamdar jazanyń jeńil túrimen qutylyp ketpeýi kerek. Qylmystyq zańnama normalary ónerkásiptik qaýipsizdikti qamtamasyz etýdiń tıimdi quralynyń birine aınalýy tıis», - dedi senator.
