Senator saıajaıda turatyndardyń máselelerin sheshýge shaqyrdy
Senator jumyssyzdyq pen kenje qalǵan aýyl ahýaly retsiz ýrbanızatsııaǵa ákelgenin atap ótti. Nátıjesinde, adamdar jazǵy saıajaı úılerine qonystandy, olardyń kópshiliginde zańdy mártebe de joq.
«Kóptegen saıajaı aımaǵy aýmaqtyq jáne zańdy túrde naqty eldi mekenge jatpaıdy, al onda turatyndardyń sany resmı statıstıkada joq. Atap aıtqanda, jergilikti atqarýshy organdardyń derekteri boıynsha respýblıkalyq mańyzy bar qalalardyń shekarasynda ornalasqan saıajaı ýchaskeleriniń sany: Nur-Sultan qalasynda – 12 myńnan astam, Almaty qalasynda - 26 myńnan astam, Shymkent qalasynda – 17 myńnan astam», - dedi ol Úkimet basshysy Álıhan Smaıylovtyń atyna joldaǵan saýalynda.
Olga Býlavkına mundaı saıajaı aımaqtarynda sheshilmegen máseleler kóp ekenin atap ótti. Turǵyndar úıleriniń gazben, ortalyqtandyrylǵan sýmen qamtamasyz etilmeýine shydaýǵa májbúr. Keıbir aýdandarda jaryq joq, jol men medıtsına mekemeleri joq. Jastarmen jumys isteý problemalary da erekshe nazar aýdarýdy talap etedi.
«Saıajaı aımaqtarynda turatyn jastar týraly aıtqanda, olardyń áleýmettik-mádenı, bilim berý ınfraqurylymyna qoljetimdiligi shekteýli dep aıtýǵa bolady. Joǵaryda aıtylǵandardyń bári jastardyń bir bóliginiń ómir súrý deńgeıiniń tómendeýine jáne bılik ınstıtýttaryna senimsizdik týǵyzýǵa dýshar etedi», - dedi Olga Býlavkına.
Atalǵan máselelerdi sheshý úshin ol saıajaı aımaqtarynyń aýmaqtaryna quqyqtyq mártebe berý jáne olardy aýmaqtardy damytý baǵdarlamasyna engizý máselesin qaraýdy usyndy.
Sonymen qatar, saıajaı aımaqtaryndaǵy jaǵdaıǵa taldaý júrgizý mańyzdy. Bul turaqty turatyn azamattardyń naqty sanyn jáne olardyń áleýmettik muqtajyn qanaǵattandyrý dárejesin anyqtaý úshin qajet.
Senator sondaı-aq bilimi men kásibı daıyndyq deńgeıin anyqtaý, sondaı-aq eńbek resýrsyn jumyspen qamtý salalary boıynsha bólý maqsatynda osy aýmaqtarda turatyn halyqtyń áleýmettik-ekonomıkalyq sıpattamalyq kartasyn jasaý qajettigin atap ótti.
