Senator «Saryaǵash» shıpajaıyn jekeshelendirýge qarsy shyqty
Bul jaıynda QR Parlamenti Senatynyń deptýtaty Álı Bektaevtyń Premer-Mınıstr Baqytjan Saǵyntaevtyń atyna joldaǵan depýtattyq saýalynda aıtylǵan, dep habarlaıdy QazAqparat.
Senatordyń aıtýynsha «Saryaǵash» shıpajaıynyń ujymy shıpajaıdy 2018 jyly engizilgen jekeshelendirý tiziminen shyǵarýdy ótinip depýtatqa hat joldaǵan.
«Ýaqytynda Qazaqstannyń Kásipodaqtar uıymyna qaraǵan ataqty emdeý ortalyǵy 2013 jyldan beri kommýnaldyq menshik ıeliginde. Buryn da, keıingi ýaqyttarda da «Saryaǵash» shıpajaıy ózin-ózi tolyq qarjylandyryp, memleketke tıisti salyqtaryn tólep, tapqan tabysqa jańa ǵımarattar salyp, tıisti emdeý qurylǵylaryn alyp, halyqqa qyzmet etip kele jatqan birden-bir emdeý-saýyqtyrý mekemesi. Memleket esebinen qarjy surap otyrǵan joq. Tek 2017 jyldyń qorytyndysy boıynsha 1,5 mlrd teńgeniń qyzmeti kórsetilgen. 108 mln teńgeden astam salyq tólengen. Demalýshylar tarabynan shıpajaı tarabyna aryz-shaǵymdar túsken emes», - dedi ol.
Onyń dereginshe, tek 2017 jyly ǵana 20 myńnan astam adam «Saryaǵash» shıpajaıynda demalyp, em alǵan.
«Bizdiń oıymyzsha, qarjylyq jaǵdaıyna, áleýmettik mártebesine qaramaı kásiporyndar men mekemelerdiń barlyǵyn jekeshelendire berý ózindik maqsat bolmaýy kerek. «Saryaǵash» sııaqty ózin ózi qarjylandyryp, memleketke salyqtardy der kezinde tólep, qarapaıym halyqqa qyzmet etip jatqan kásiporyndardy jekeshelendirýdiń qajeti joq dep esepteımiz. Osyny eskere otyryp, «Saryaǵash» shıpajaıyn jekeshelendirý tizimine shyǵarý jónindegi ujymnyń ótinishine baılanysty tıisti sharalardy qabyldaýdy ótinemin», - dedi Álı Bektaev.
