Senator Sáken Arýbaev ońtústiktegi óńirlerdiń egis sýaratyn júıelerin jetildirýge qosymsha qarajat surady
Senator elimizdiń Úkimeti 2014 jyly Almaty, Jambyl, Túrkistan jáne Qyzylorda oblystarynda ırrıgatsııalyq jáne drenaj júıelerin jańǵyrtý men damytý úshin kelisim jasasqanyn eske saldy.
«Halyqaralyq qaıta qurý jáne damý bankimen jasalǵan kelisim boıynsha joba 2021 jyly aıaqtalýy kerek bolatyn. Biraq qarjynyń respýblıkalyq bıýdjetten júıeli túrde tolyq bólinbeýinen, jobanyń aıaqtalý merzimi 2024 jyldyń sońyna deıin uzartyldy. Saldarynan 4 oblys boıynsha aıaqtalýǵa tıisti 11 jobanyń 2 jobasy ǵana aıaqtalǵan. Qalǵan 9 jobanyń qurylys-montaj jumystary sozylyp ketti. Sonyń saldarynan jospardaǵy 105 myń gektar jerdiń 10 myń gektary ǵana aǵyn sýmen qamtamasyz etilip otyr. Bıyl osy jumystardy aıaqtaýǵa suralǵan 20,3 mlrd teńge qarjynyń tek 7,2 mlrd teńgesi qoldaý tapqan. Bul jobanyń tolyq iske asýy taǵy da 2-3 jylǵa sozylady degen sóz», - dedi Sáken Arýbaev depýtattyq saýalynda.
Depýtattyń sózinshe, Jambyl oblysynda sýarý kanaldaryn jańǵyrtý jumysynda kúrdeli jaǵdaı qalyptasyp otyr. Óńirdegi sýarmaly alqapty jıyntyq aýdany 181,8 myń gektar bolady. Onyń 89,1 myń gektary ǵana sýmen normatıvke sáıkes mólsherde qamtamasyz etilgen.
Senator osyǵan baılanysty qazirdiń ózinde júzege asyp jatqan jobalardy aıaqtaý úshin, sondaı-aq Jambyl oblysynyń sýarmaly jerlerin qalpyna keltirýdiń jol kartasyna sáıkes sý obektileriniń qurylysyn respýblıkalyq bıýdjetten qarjylandyrý úshin qarajat kózin izdestirý qajettigin atap ótti.
