Senator S.Jalmaǵambetova Atbasar turǵyndaryn sý basqan aımaqtan kóshirýdi usyndy
ASTANA. QazAqparat - Búgin Parlament Senatynyń jalpy otyrysynda depýtat Svetlana Jalmaǵambetova Aqmola oblysy Atbasar qalasynyń turǵyndaryn sý basqan aımaqtan kóshirý týraly Úkimetke usynys jasady. Eske sala keteıik, Atbasar qalasynda sáýir aıynyń basynda kúnniń kurt jylynýy saldarynan 400 úıdi sý basyp, 250 adam kóshirilse, myńǵa tarta adam qaýipti aımaqty ózderi tastap shyqqan.
Al senatordyń aıtýynsha, Atbasardaǵy 40-tan astam úı qalpyna keltirýge jaramsyz. Budan bólek, sý astynda qalǵan úılerdiń biraz bóligi áli tekserilmegen. «Sý tasqynynyń saldaryn joıý - keń aýqymdy shara. Bul baǵytta buzylǵan, jaramsyz jáne apatty jaǵdaıdaǵy úılerdiń ornyna jańa baspanalar salý, joldardy jóndeý, mektepter salý, japa shekkenderge járdemaqy berý sharalary qamtylýy tıis. Sý basqan úılerdiń bári birdeı tekserilip shyqpaǵanyna qaramastan, qazirdiń ózinde 200-den astam páter salý qajettiligi aıqyn bolyp otyr. Sonymen birge, sý basýdan qorǵaıtyn bógetter salýdy da qatar sheshýge tıispiz», - dedi S.Jalmaǵambetova. Depýtattyń sózine qaraǵanda, aldyn ala baǵalaýlar boıynsha qajetti jumystarǵa ketetin shyǵyn 2,4 mlrd. teńgeni quraıdy. Onyń ústine mamandar Atbasar aýdanynyń udaıy sý basý qaýpindegi aımaqtardan turǵyndardy kóshirýdiń qajettiligin kótergen. «Osyǵan oraı, Úkimetten tabıǵı apattyń saldarynan oryn alǵan problemalardy tolyǵymen sheshýdi, ony joıý boıynsha qajetti qarajattardy tolyq bólýdi suraımyz», - dedi depýtat. Sonymen qatar, senator óz áriptesterin Atbasardaǵy jaǵdaıǵa oraı bir kúndik jalaqylaryn japa shekkenderdi qoldaý qoryna aýdarýǵa shaqyrdy.
