Senator «oralman» termıninen bas tartýdy usynady

ASTANA. QazAqparat - «Oralman» termıninen bas tartý kerek. Búgin Senattyń Halyqaralyq qatynastar qorǵanys jáne qaýipsizdik komıtetiniń keńeıtilgen otyrysynda komıtet tóraǵasy Ikram Adyrbekov osyndaı másele kóterdi. Eske salaıyq, otyrysta «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.

«Eger bizde bir uǵym, qandaı da termın paıda bolsa, soǵan aıaǵyna deıin baılanyp qalamyz. Qazirgi kúni bizde «oralman» termıniniń ózi birshama keri túsinik týdyryp júr. Azamattyq alǵandar ózderiniń mártebesin aýystyryp, «oralman» mártebesinen aıyrylady dep jatyr - buǵan kelispeımin. Óıtkeni, basynan bastap oǵan «oralman» degendikten ol aýyldastary úshin de, sol óńir úshin de oralman bolyp qala beredi», - deıdi senator talqylaý barysynda. Osyǵan oraı, depýtat shetten kelgen etnıkalyq qandastar ǵana emes, olardyń balalary da «oralman» bolyp otyrǵanyna da qynjylys bildirdi.

«Nege ýaqytynda durys termın qabyldanbaǵan, máselen «baýyrlas», «otandas» sekildi? Búgingi úderisti eskere otyryp, bul termındi qaıta qarastyrý kerek dep oılaımyn. Sol qandastarymyzdyń ózderin qatystyra otyryp talqylasaq, biz budan áldeqaıda laıyqty termın taba alamyz dep senemin», - dedi ol.

Aıta keteıik, zań jobasynda etnıkalyq qazaqtardy tarıhı otanyna oralýyn yntalandyrý sharalary qarastyrylǵan. Máselen, osy maqsatta zań jobasymen shet elden keletin etnıkalyq qandastardyń qonystaný óńirine qaramastan oralman mártebesin alý, sheteldik azamattarǵa qaraǵanda tólem qabiletin rastaýsyz ýaqytsha turý yqtııarhatyn alý múmkindigi beriledi. Bul rette Úkimet belgilegen óńirlerge qonystanǵan jaǵdaıda oralmandarǵa jaǵdaılar jasalady. Máselen, jumyspen qamtý boıynsha sharalar sheńberindegi etnıkalyq qazaqtar úshin kólik shyǵyndaryn óteıtin, qyzmettik baspana nemese jataqhanadan bólme berýdi quraıtyn áleýmettik paketter qamtylmaq. Bundaı áleýmettik kómekter elimizdiń bir óńirinen Úkimet aıqyndaǵan ekinshi óńirine qonystanǵan oralmandar úshin de beriledi. Al alǵashqy qonystanǵan, ıaǵnı Úkimet aıqyndaǵan óńirinen bes jyl merziminen buryn óz betinshe kóship-qonyp, qonys aýdaryp ketkender, Qazaqstan Respýblıkasynyń azamattyǵyn alýdan bas tartqandar ózderi alǵan memlekettik qoldaýlardy qaıtaratyn bolady. Sonymen qatar, oralmandarǵa Qazaqstan Respýblıkasynyń azamattyǵyn berý merzimin turaqty turý yqtııarhatyn alǵannan keıin bir jyl ishinde sheshý kózdeledi.

Talqylaýdan soń komıtet depýtattary zań jobasyn jalpy otyrysqa shyǵarý týraly ýaǵdalasty.