Senator óńirlerdegi aýyz sý tapshylyǵyna qatysty alańdaýshylyq bildirdi

NUR-SULTAN. QazAqparat – Parlament Senatynyń jalpy otyrysynda depýtat Erik Sultanov Soltústik Qazaqstan oblysyndaǵy aýyz sý máselesin kóterdi. Osy oraıda Premer-Mınıstr Asqar Mamınge depýtattyq saýal joldady, dep habarlaıdy QazAqparat tilshisi.

Senator keltirgen málimetterge sáıkes, 2,5 myńnan astam aýyldyq jerde áli kúnge deıin sapaly aýyz sý joq. Bunyń negizgi sebebi – bıýdjettik baǵdarlamanyń durys baqylanbaýy jáne 2019-2020 jyldary bıýdjetten bólingen qarajattyń ıgerilmeýi.

«Soltústik Qazaqstan oblysynyń sý qubyrlarynyń 67 paıyzy nemese 1955 km tolyǵymen tozǵan jáne toptyq sý qubyrlary júıesiniń aqaýly tehnıkalyq jaǵdaıy tótenshe jaǵdaılardyń týyndaýyna alyp kelip otyr. Olar Soltústik Qazaqstan jáne Qostanaı oblystarynyń 200-den astam aýyldyq eldi mekenderin sýmen qamtamasyz etýge qaýip tóndirip otyr. Magıstraldyq qubyrlardyń qatty tozýyna baılanysty tasymaldaý kezinde sý shyǵynynyń jalpy kólemi 65 paıyzdy quraıdy», – dedi E. Sultanov.

Senator óz sózinde problemalyq jobalardy da aıta ketti. Presnov toptyq sý qubyryn qaıta qalpyna keltirý jobasyn iske asyrý 2014 jyldan beri júrip jatyr, alaıda áli aıaqtalǵan joq. 2019 jyly jumystardy oryndaý qarqynynyń tómendigine baılanysty 2,9 mlrd teńge ıgerilmeı, bıýdjetke qaıtarylǵan. 2020 jyly jobany jalǵastyrýǵa 1,1 mlrd teńge bólindi, biraq bul qarajattyń da ıgerilmeý qaýpi bar.

«Osy máseleniń áleýmettik-ekonomıkalyq mańyzdylyǵyn eskere otyryp, Sizden Soltústik Qazaqstan oblysynyń aýyl halqyn sýmen jabdyqtaý problemalaryn joıý boıynsha tıimdi sharalar qabyldaýyńyzdy jáne zańnamada belgilengen tártippen jazbasha jaýap berýińizdi suraımyz», – dedi Senat depýtaty Erik Sultanov.