Senator óndiristegi jaraqattanýdyń joǵary deńgeıine alańdaýshylyq bildirdi

NUR-SULTAN. QazAqparat - Jyl saıyn elimizde 1 500-ge jýyq adam óndiriste jaraqat alady, bul rette 200-den astam jumysshy qaza tabady, al 600 adam jumys kezinde mertigý jáne kásibı aýrýlar saldarynan múgedektik alady. Bul týraly senator Narıman Tóreǵalıev málim etti, dep habarlaıdy QazAqparat tilshisi.

«2020 jyly tekserilgen 1,6 mln jumysshynyń 22% zııandy jáne qaýipti eńbek jaǵdaıynda jumys istegeni anyqtalǵan. Nátıjesinde, jyl saıyn 500-ge jýyq jumysshydan kásiptik aýrýdyń alǵashqy belgileri tirkelýde. Odan basqa, 2020-2021 jyldary, eńbek ınspektorlarymen anyqtalǵan 11 myńnan asa ereje buzýshylyq bolsa, sonyń 34% eńbek qaýipsizdigi men eńbekti qorǵaý salasynda tirkelgen», - dedi Narıman Tóreǵalıev Senattyń jalpy otyrysynda QR Premer-Mınıstri Álıhan Smaıylovtyń atyna joldaǵan depýtattyq saýalynda.

Qazirgi ýaqytta elimizde 300 myńǵa jýyq kásiporyn jumys istep tur. Alaıda, olarda memlekettik baqylaýdy tek 237 eńbek ınspektory ǵana júrgizedi. Inspektorlardyń jetispeýshiligine baılanysty jyl saıyn uıymdar men kásiporyndardyń tek 3%-yn tekserýmen qamtý múmkin bolyp otyr.

Senator túsindirip ótkendeı, bul quzyretti organdar óndiristegi jazataıym oqıǵalardyń aldyn alýmen kúrespeıdi, tek oqıǵa oryn alǵan kezde ǵana faktilermen jumys isteıdi.

Sonymen qatar, Kásipkerlik kodeksine sáıkes ınspektorlar josparly tekserý júrgizý týraly 30 kúntizbelik kún buryn eskertýge mindetti. Qyzmetkerlerdiń ómiri men densaýlyǵyn qorǵaý úshin halyqaralyq eńbek uıymynyń normalary boıynsha ınspektorlar jospardan tys tekserý júrgizýge de quqyly bolýy tıis.

«Baıandalǵandy eskere otyryp, Kásipkerlik kodekste kózdelgen eńbek ınspektorlarynyń qyzmetin shekteý týraly normalardy Halyqaralyq eńbek uıymynyń konventsııalaryna sáıkes keltirý mańyzdy dep sanaımyz. Sonymen qatar, memlekettik eńbek ınspektorlarynyń sanyn arttyrý máselesin pysyqtaý, sondaı-aq óndiristegi jazataıym oqıǵalar faktisi týraly ýaqtyly habarlamaǵany úshin jumys berýshiniń ákimshilik jaýapkershiligin kúsheıtý máselesin qaraý qajet», - dedi senator.

Depýtat sondaı-aq senatorlardyń bastamasy boıynsha qazir elimizdiń «Eńbek kodeksine» tıisti ózgerister men tolyqtyrýlar engizý týraly zań jobasyn ázirleýge daıyndalyp jatqanyn atap ótti.