Senator Omby men Túmennen SQO-ǵa gaz tartýdy usyndy
Senat depýtaty Ásem Rahmetova Premer-Mınıstri Álıhan Smaıylovtyń atyna joldaǵan saýalynda Reseıdiń Omby jáne Túmen oblystarynan soltústik óńirlerge gaz tartýdy usyndy, dep Kazinform.
«Tabıǵı gazben qamtamasyz etý máselesi Soltústik Qazaqstan jáne Aqmola oblystary úshin ózekti máselelerdiń biri bolyp tur. Senat depýtattarynyń óńirge sapary kezinde turǵyndar, bıznes qaýymdastyq ókilderi ózge máselelerden buryn gaz máselesin erekshe kóterdi. Sebebi bul oblystardyń halqy ómir sapasyna qalaı áser etetinin Reseıdiń Qostanaıǵa shekaralas, ondaǵan jyldan beri gazy bar Túmen, Omby, Qorǵan oblystary turǵyndarynyń turmysynan kórip otyr. Ózgeler kógildir otynnyń qyzyǵyn kórip jatqanda kórshi otyryp kómir tasyǵan aýyl turǵynynyń tilegin jetkizip otyrmyz», - dedi depýtat.
Sondaı-aq ol eldi gazdandyrýdyń 2023-30 jyldarǵa arnalǵan bas kestesi boıynsha soltústik óńirlerdi gazdandyrý 2026 jyly bastalatynyn eske saldy.
«Energetıka mınıstrliginiń Soltústik Qazaqstan jáne Aqmola oblystaryn gazdandyrý jónindegi jumysty bastaý jospary boıynsha 2026 jyldan bastap, úshinshi kezeń aıasynda, biraq Beıneý-Bozoı-Shymkent magıstraliniń ekinshi jelisi salynyp bitkennen keıin bastalady. Gazdy Astanadan Kókshetaý qalasyna, ári qaraı Petropavlǵa jetkizý kózdelgen. Soltústik oblystardy gazdandyrýdyń balama joldary bar. Olardyń biri – Reseı Federatsııasyndaǵy Túmen oblysynyń Ishım qalasynda qosylý núktesi bar magıstraldi gaz qubyryn salý. Bul Ishım qalasy Petropavl qalasynan 156 shaqyrymda jatyr. Bir kezderi osy jobanyń búkil ekonomıkalyq-tehnıkalyq saraptamalary men aldyn ala esebi júrgizilgen bolatyn. Omby qalasynan Petropavlǵa gaz jetkizý nusqasynda da qarastyrýǵa bolady. Biraq bul jaǵdaıda gaz qubyrynyń uzyndyǵy 286 shaqyrym bolady dep eseptelgen», - dedi ol.
Vedomstvo basshysy Reseıden gazdy Petropavlǵa jetkizý jobasy Saryarqa magıstraldi gaz qubyryna qosylaýǵa da múmkindik beretinin aıtady.
«Sizden Aqmola jáne Soltústik Qazaqstan oblystaryn gazdandyrýdyń naqty merzimin belgileýdi suraımyn. Reseıdiń Ishım qalasynda qosylý núktesi bar magıstraldi gaz qubyryn salýdy balama nusqa retinde qarastyrylyp otyr ma?» - dedi Ásem Rahmetova.
