Senator omartashylar men maral ósirýshilerdi qoldaýdy surady

NUR-SULTAN. QazAqparat – Elimizdiń ara jáne maral sharýashylyqtary kúrdeli jaǵdaıdy bastan keshýde. Búgin senator Dúısenǵazy Mýsın elimizdiń Premer-Mınıstriniń atyna osyndaı depýtattaq saýal joldady. Depýtat bul salalar shuǵyl memlekettik qoldaýdy qajet etetinine nazar aýdardy, dep habarlaıdy QazAqparat tilshisi.

Depýtattyń paıymynsha, asyl tuqymdy ara uıalary men olardyń ónimderin óńdeý kásiporyndarynyń bolmaýy, asyl tuqymdy omartalar sanynyń azdyǵy, materıaldyq-tehnıkalyq bazanyń jetkiliksizdigi jáne veterınarlyq qyzmet jumysyndaǵy kemshilikter sheshimin tabýǵa tıisti máselelerdiń qatarynda tur. Salany damytýdy júıeli josparlaý, keshendi zertteýler, selektsııalyq jumysty júıeleý, sondaı-aq aýdandastyrylǵan jáne asyl tuqymdy omartalar jelisin qurý jaǵdaıdy jaqsartýy tıis.

Maral ósirý sharýashylyqtaryna keletin bolsaq, depýtat ótken 30 jyl ishinde sharýashylyqtardaǵy janýarlardyń sany eki ese qysqarǵanyn atap ótti.

«Bul salalardy qamtıtyn memlekettik baǵdarlamalar jáne «Aýyl – El besigi» arnaıy jobasy aıasynda úılestirilgen sharalar, shalǵaıdaǵy, ásirese shekara boıyndaǵy halyqtyń ál-aýqatyn arttyrýǵa serpin bereri sózsiz», - dedi Dúısenǵazy Mýsın.

Senator ázirlenip jatqan Agroónerkásip keshenin damytýdyń 2022-2026 jyldarǵa arnalǵan ulttyq jobasy aıasynda memlekettik qoldaý kórsetýdi usyndy.