Senator obamen kúresetin mamandardyń jalaqysyn kóterýdi surady
Onyń aıtýynsha, qazirgi kezde elimizdiń Obaǵa qarsy qyzmeti Masǵut Aıqymbaev atyndaǵy Asa qaýipti ınfektsııalar ulttyq ǵylymı ortalyǵynyń quramynda. Bul ortalyqty osyǵan deıin «QazBioPharm» ulttyq holdınginiń quramyna engizý josparlanǵan bolatyn. Alaıda, dál qazir Densaýlyq saqtaý mınıstrligi deńgeıinde Ortalyqty qaıta qurý, ıaǵnı obaǵa qarsy kúres qyzmetin jeke memlekettik mekeme retinde bólek shyǵarý máselesi qolǵa alynǵan.
Depýtattyń paıymynsha, Qazaqstanda obanyń sońǵy jaǵdaıy 20 jyl buryn tirkelgenine qaramastan, keıingi jyldary adamzat bıologııalyq álemdegi turaqsyzdyqqa tap boldy. Bul rette SARS, COVID-19, qus tumaýy jáne shoshqa tumaýy sekildi indet tarady. Sondyqtan osy saladaǵy baqylaýdy álsiretý jáne tıisti qurylymdy bólshekteý el halqy densaýlyǵyna teris áser etýi múmkin.
Sala qyzmetkerleri jalaqy máselesin kóterip otyr. Senatordyń aıtýynsha, obaǵa qarsy qyzmet salasy qyzmetkerleriniń jalaqysynyń ósýine qaramastan, onyń qorytyndysy boıynsha medıtsınalyq jáne medıtsınalyq emes bilimi bar qyzmetkerlerdiń arasynda jalaqy mólsherine qatysty aıtarlyqtaı aıyrmashylyq paıda boldy.
«Bıologııalyq materıaldy óńdeý jáne zararsyzdandyrý, tıisti synaq aıasynda janýarlarǵa kútim jasaý, kúshti áser etetin ýly preparattarmen jáne dalalyq jaǵdaılarda jumys isteý kezinde bıologııalyq táýekel qateri úshin qosymsha aqy eskerilmegen. Sonyń nátıjesinde, obaǵa qarsy qyzmet qyzmetkerleriniń tek 23%-y ǵana kásibı qyzmetke baılanysty táýekel úshin laýazymdyq jalaqynyń 50 paıyzy somasyndaǵy qosymsha aqymen qamtylǵan. Bul jaǵdaı daıyndalǵan kadrlardyń saladan ketip qalýyna sebep bolýy múmkin. Osy turǵyda barlyq qyzmetker men bıologııalyq táýekel aıasynda jumys isteıtin adamdarǵa erekshe eńbek jaǵdaıy úshin qosymsha aqyny qalpyna keltirý qajet», - dedi senator Premer-Mınıstr Álıhan Smaıylovtyń atyna joldaǵan saýalynda.
Aqmaral Álnazarova Úkimet basshysyna obaǵa qarsy kúres qyzmet salasyndaǵy qyzmetkerlerdiń bıologııalyq qaýip-qaterge ushyraýy deńgeıin eskere otyryp, olardyń jalaqysy somasyn qaıta qaraýdy surady.
Munymen qosa ol atalǵan qyzmetti jeke mekemege bólmeı, ony M.Aıqymbaev atyndaǵy Asa qaýipti ınfektsııalardyń ulttyq ǵylymı ortalyǵy quramynda qaldyrýdy usyndy.
Onyń paıymynsha, bul ortalyqty «QazBioPharm» holdınginiń quramyna ótkizý jumysyn jedeldetý kerek.
