Tehnologııanyń úzdiksiz damýy mektep baǵdarlamasyn jańǵyrtý qajettigin qajet etedi - Nurtóre Júsip
ASTANA. KAZINFORM – Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip oqý-aǵartý, ǵylym jáne joǵary bilim mınıstrlikteriniń birlesken alqasynyń jumysyna qatysty. Kezdesýge qatysýshylar ulttyq bilim berý protsesine jasandy ıntellekt tetikterin engizý arqyly qoldanystaǵy bilim berý júıesin reformalaý máselelerin talqylady.
«Prezıdent Úkimettiń jańa quramynyń keńeıtilgen otyrysynda jahandyq transformatsııa aıasynda bilim berý máselesine nazar aýdaryp, jasandy ıntellektiniń damý dáýirinde jańa bilim berý baǵdarlamalaryn engizý qajettigin atap ótken bolatyn. Jasandy ıntellekt bizdiń ómirimizge tereńirek engen saıyn oqý baǵdarlamasyna mektepten tys qalyptasatyn qabilet-daǵdyny damytý sharalaryn engizý qajettigi de ulǵaıyp keledi. Tehnologııanyń úzdiksiz damýy mektep baǵdarlamasyn jańǵyrtý qajettigin týǵyzýda, biraq bilim berý júıesindegi ózgerister, ásirese osyndaı aýqymda, kóbinese baıaý júredi. Osyǵan baılanysty bilim berý júıesi aldaǵy ózgeristerdi aldyn ala boljap, jetkinshek urpaqty daıyndaýy tıis», - dedi Nurtóre Júsip.
Senator Memleket basshysynyń osy baǵyttaǵy Úkimet aldyna qoıǵan barlyq mindeti birinshi kezekte jáne strategııalyq mańyzy bar ekenin atap ótti. Prezıdent belgilegen mindetterdi iske asyrý úshin Úkimet tıisti tetikterdi ázirleýi qajet. Parlament óz kezeginde Prezıdenttiń tapsyrmalaryn ýaqtyly jáne sapaly oryndaý úshin zańnamalyq qoldaý kórsetýge daıyn.
Alqa otyrysy barysynda otandyq bilim jáne ǵylym júıesin damytýǵa jáne salalyq mekemelerdiń qyzmetine qatysty birqatar ózekti másele boıynsha pikir almasý boldy.
