Senator Nazarbaeva Eýropalyq Odaqtyń QR-daǵy ókildiginiń basshysymen kezdesti
ASTANA. QazAqparat - Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva Eýropalyq Odaqtyń Qazaqstan Respýblıkasyndaǵy ókildiginiń basshysy Traıan Hrısteamen kezdesti, dep habarlaıdy joǵarǵy palatanyń baspasóz qyzmeti.
Senator Eýropalyq Odaqpen qarym-qatynas Qazaqstannyń syrtqy saıasatynyń strategııalyq baǵyttarynyń biri ekenin atap ótti.
Darıǵa Nazarbaeva Qazaqstan men Eýropalyq Odaq arasyndaǵy keńeıtilgen áriptestik pen yntymaqtastyq týraly jańa kelisimdi tıimdi iske asyrý ekijaqty yntymaqtastyqtyń basymdyqqa ıe máseleleriniń biri ekenin jetkizdi.
«Biz jańa qujattyń barlyq áleýetin tezirek iske asyrýǵa múddelimiz. Eýroodaq elderiniń ulttyq parlamentterinde ratıfıkatsııalaý jáne ony Eýropalyq Parlamentte qaraý uzaqqa sozylmaıdy dep senemiz», - dedi senator.
Qazirgi kezde qujatty Eýropalyq Odaqqa múshe 8 memleket qujatty ratıfıkatsııalady.
T.Hrıstea Qazaqstan Eýropalyq Odaqtyń Ortalyq Azııadaǵy eń mańyzdy áriptesi ekenin aıta kelip, ózara tıimdi yntymaqtastyqty nyǵaıtýda parlamenttik dıplomatııanyń róline toqtaldy.
Taraptar sondaı-aq mádenı-gýmanıtarlyq saladaǵy ózara is-qımyl máselelerin de talqylady. Eýropalyq Odaq Ókildiginiń basshysy Eýropanyń 5 myńnan astam ýnıversıtetteri Qazaqstannyń joǵary oqý oryndarymen yntymaqtasýǵa ázir ekenin, Qazaqstannyń 15 joǵary oqý orny stýdentter almasý baǵdarlamasy boıynsha Eýropalyq Odaq elderine oqýshylar jibergenin jetkizdi.
Sondaı-aq, Qytaı Halyq Respýblıkasynyń Elshisi Chjan Hanhýeımen kezdesýde Qazaqstan men Qytaı arasyndaǵy yntymaqtastyqty keńeıtýdiń keleshegi talqylandy. 
Elshi Qytaı úshin Qazaqstan «tamasha dos, qaıyrymdy kórshi jáne senimdi áriptes» ekenin atap ótti. Ol elderimizdiń 25 jyldyq yntymaqtastyqta qol jetkizgen tabystary týraly habardar etti. «Bizdiń elimiz Qazaqstannyń beıbitshilikti, turaqtylyqty qoldaý jáne halyqtyń ál-aýqatyn arttyrý jónindegi saıası jáne ekonomıkalyq reformalaryn qoldaıdy», - dedi dıplomat.
Nazarbaeva Qazaqstan men Qytaı halyqtarynyń ıgiligi úshin ózara tıimdi is-qımyldy údetý qajettigin atap ótti.
Ch.Hanhýeı bıylǵy jyl halyqaralyq sharalar turǵysynda óte mazmundy ekenine de toqtaldy. Bıylǵy maýsymda Astanada ShYU-ǵa múshe elderdiń memleket basshylarynyń Sammıti ótedi, sondaı-aq EKSPO-2017 halyqaralyq kórmesi ashylady jáne oǵan QHR Tóraǵasy Sı Tszınpınniń qatysýy kútilip otyr.
