Senator Murat Bahtııaruly: Memlekettik tildi úıretýge kelgende qarjyny aıamaýymyz kerek
«Jalpy, Elbasynyń Joldaýy jan-jaqty talqylanyp jatyr. Joldaýda mynadaı bir eki fraza bar: Memleket basshysy «Qazaq tilin halyqaralyq deńgeıge kóterý» degen máseleni kóterdi. Ony qalaı kóteremiz? Onyń qandaı joldary bar? Ne isteımiz? Ekinshi másele, kóp Joldaýlarda bolǵan emes, ıdeal týraly sóz aıtty. Óziniń tarıhyn, tilin , mádenıetin meńgergen, ozyq oıly, kózqarasy bar azamattar qoǵamymyzdyń ıdealyna aınalý kerek degen sóz aıtyldy. Bir sóılemniń artynda kóptegen pikirler jatyr. Sondyqtan, bul máselege kelgende Til komıteti biraz jumys jasaý kerek sekildi», - deıdi senator.
Murat Bahtııaruly óz sózinde Senat depýtattarynyń Qazaqstannyń túkpir-túkpirin aralaý kezinde qazaq tiliniń ahýaly qoǵamda áli de ózekti máselege aınalyp turǵanyna kóz jetkizgenin aıtady.
«Qazaq tiline áli de alańdaýshylyq zor, kóp. Ásirese, úshtildi máselege baılanysty aıtýymyz kerek. Biz osy úshtildilik máselege baılanysty 20-ǵa jýyq senator Úkimet basshysyna depýtattyq saýal joldaǵan bolatynbyz. Elbasynyń saıasaty óte durys. Balalarymyzdyń aǵylshyn tilin meńgergeni durys. Oǵan qoǵamda eshkim qarsy emes. Biraq, osy tildi oqytý merzimi, ýaqyty, onyń kezeń-kezeńmen oqytý máselesin qozǵaǵan edik. Elbasy keıinnen bir sózderinde kezeń-kezeńmen, ásirese aýyldyq mektepterde ary qaraı jyljytýdy tapsyrdy. Biraq, osyǵan baılanysty áli de máseleler bar», - deıdi ol.
Senator sonymen birge, jaqynda ǵana el aralaǵan kezde mektepterde bolǵan jaılardy mysalǵa keltirdi.
«Mektepterde aǵylshyn tili úsh aılyq kýrstar arqyly ótedi eken. ıAǵnı, matematıka, hımııa pánderin aǵylshyn tilinde berý úshin muǵalim úsh aılyq kýrstan ótedi. Biraq, úsh aı ǵana oqyǵan muǵalim aǵylshyn tilin qalaı biledi? Ol múmkin nárse emes. Biz osy máseleni áli de Úkimettiń aldyna qoımaqpyz. Asyǵýǵa jol berýge bolmaıdy», - deıdi Murat Bahtııaruly.
«Memlekettik tildi úıretýge kelgende memlekettiń qarajatyn aıamaýymyz kerek» degen depýtat qoǵamnyń ózekti máselesin atady.
«Úlken máseleniń biri - memlekettik tilge kelgende áli de bolsa qarjylaı qoldaýdyń jetispeıtindigi. Úırengisi keletin ózge ulttyń azamattary kóp. Biraq, áli de bolsa bul turǵyda kóptegen máseleler bar. Zııaly qaýym, Parlament depýtattary, til janashyrlary barlyǵy bul máseleni aqparat quraldarynda kótere bergenin óz basym durys dep esepteımin», - dep túıdi sózin senator.
