Senator múmkindigi shekteýli jandarǵa beriletin baspana máselesin kóterdi
NUR-SULTAN. QazAqparat - Senator múmkindigi shekteýli jandarǵa arnap salynatyn úı qurylysynyń sapasyn arttyrýdy talap etip otyr, dep habarlaıdy QazAqparat tilshisi.
«Memleket basshysy óziniń Qazaqstan halqyna Joldaýynda múmkindigi shekteýli adamdar árqashan memlekettiń erekshe nazarynda bolýǵa tıis degen bolatyn. Bizdiń depýtattyq saýalymyzǵa múmkindigi shekteýli adamdarǵa beriletin baspana máselesi sebep bolyp otyr. Múgedek adamdarymyz uzaq jyldar boıy turǵyn úı kezegi arqyly baspanany kezekpen alýǵa bolatynynan kúder úzip, kúmánmen qaraıtyn jaǵdaıǵa jetti», - dedi senator NarımanTóreǵalıev Úkimet basshysynyń atyna joldaǵan depýtattyq saýalynda.
Onyń aıtýynsha, múmkindigi shekteýli jandarǵa beriletin páterler tıisti talaptarǵa saı bolmaı jatady. Paıdalanýǵa berilgen turǵyn úıler men páterler bólmeleriniń ishi ýákiletti organ bekitken erejelerge sáıkes, múmkindigi shekteýli adamdardyń qajettiginen týyndaıtyn sanıtarlyq talaptarǵa saı jobalanyp berilýi kerek edi. Alaıda bul talaptar oryndalmaı jatyr.
Ol baıandalǵandy eskere otyryp, birqatar sharalardy júzege asyrý qajettigin aıtty.
Birinshiden, Memleket basshysynyń tapsyrmasyna sáıkes ázirlenip jatqan «Áleýmettik kodeks» aıasynda múmkindigi shekteýli adamdar úshin qoljetimdi orta týraly zań normalaryn ázirlep, osy kodekske arnaıy bólimmen engizý usynyldy.
Ekinshiden, múmkindigi shekteýli jandardy qoljetimdi baspanamen qamtý maqsatynda «Turǵyn úı qatynastary týraly» Zańǵa jáne múgedekterge beriletin turǵyn úılerge qoıylatyn talaptardy keńeıtý bóliginde ýákiletti organnyń erejeler jınaǵyna halyqaralyq zańnamalar tájirıbesin zerdeleı otyryp, ózgerister men tolyqtyrýlar engizý eskerildi.
Úshinshiden, jergilikti atqarýshy organdarǵa jańadan salynatyn turǵyn úılerdiń jobalyq-smetalyq qujattamalaryn ýákiletti organnyń erejeler jınaǵynyń talaptaryna saı josparlaýdy qadaǵalaý usynyldy.
