Senator múgedektigi bar adamdardyń qaýipsizdigine qatysty usynys jarııalady
ASTANA. KAZINFORM – Senator Lázzat Qaltaeva depýtattyq saýalynda múgedektigi bar adamdardyń tótenshe jaǵdaı kezindegi qaýipsizdigin qamtamasyz etý problemasyn kóterdi.
Onyń aıtýynsha, tótenshe jaǵdaı kezinde, ıaǵnı Covid pandemııasy, Qańtar oqıǵasy, Almatyda jer silkingen kezde qazaqstandyqtardyń bul áleýmettik toby aqparattan múldem tys qaldy. Demek, densaýlyq pen ómirlerine qaýip tóngeni anyq. Tótenshe jaǵdaı qyzmetteri múgedektigi bar adamdarǵa qatysty tıisti uıymdarda sońǵy ret 10 jyl buryn oqý-jattyǵý uıymdastyrǵan.
Sonymen qatar depýtat múgedektigi bar adamdardy qutqarý jáne evakýatsııa máselesi bar ekenin atap ótti. Zertteý málimetine qaraǵanda, ákimdikterde osy azamattardy tabýdyń tıisti kartasy joq, al qutqarýshylar múgedek adamdardy evakýatsııalaý barysynda olarmen baılanysqa shyǵý is-qımylyn bilmeıdi.
«Osy másele boıynsha óz oıymdy ortaǵa sala otyryp, nazar aýdaratyn problemalardy atap ótpekpin. Múgedek adamdar tirkelgen uıymdardan sarapshylardy qatystyryp, halyqty oqytý, evakýatsııalaý, ornalastyrý jáne áleýmettik qamsyzdandyrý jónindegi jospar ázirleý kerek. Múgedektigi bar adamdardyń erekshe suranysyna sáıkes keletin baspanalardy jobalaý jáne jaraqtandyrý qajet. Zamanaýı ádister men tehnologııany paıdalana otyryp, ártúrli naýqasy bar adamdarǵa arnalǵan aqparat berý jáne oqytýdyń arnaıy baǵdarlamasyn ázirleý kerek. Tótenshe jaǵdaı kezinde olardy izdeý jáne naqty kómek kórsetý úshin osy azamattardyń biryńǵaı derek qoryn qurý kerek», - dedi Lázzat Qaltaeva.
