391 kásiporynda jalaqy qaryzy bar: Inspektsııa 2,2 mlrd teńge bereshekti tirkedi

ASTANA. KAZINFORM — Jyl basynan beri memlekettik eńbek ınspektorlary 42,9 myńnan astam jumyskerdiń quqyǵyn qorǵady, dep habarlaıdy Eńbekmıni baspasóz qyzmeti.

2025 jylǵy 1 qazandaǵy jaǵdaı boıynsha memlekettik eńbek ınspektorlary respýblıkanyń 391 kásiporny 9,3 myńnan astam jumyskerge 2,2 mlrd teńgege jalaqy boıynsha bereshek ekenin anyqtady. Sonymen birge túrli uıymdarda júrgizilgen tekserýler barysynda eńbek quqyǵy buzylýynyń 5,5 myńnan astam faktisi anyqtaldy.

— Jalaqy boıynsha bereshegi jáne eńbek quqyǵynyń buzylýy anyqtalǵan kásiporyndardyń basshylaryna oryndaýǵa mindetti 2 932 uıǵarym berildi jáne 370,9 mln teńgeden astam somaǵa aıyppul salyndy, — delingen habarlamada.

Qabyldanǵan sharalardyń, onyń ishinde jalaqy boıynsha bereshekti óteýdiń qatań kesteleri men merzimderin belgileýdiń nátıjesinde 8,9 myń jumyskerdiń quqyqtary qorǵaldy. Olarǵa 1,8 mlrd teńge tólendi.

Budan basqa, eńbek zańnamasynyń saqtalýyna memlekettik baqylaýdy qamtamasyz etý máseleleri QR Eńbek jáne halyqty áleýmettik qorǵaý mınıstrliginiń erekshe baqylaýynda.

2025 jylǵy 1 qazandaǵy derekter boıynsha memlekettik eńbek ınspektorlary 4 572 tekserý júrgizdi, onyń barysynda 5 523 buzýshylyq anyqtaldy, onyń ishinde: eńbek salasynda — 4 590; eńbek qaýipsizdigi jáne eńbekti qorǵaý boıynsha — 909; halyqty jumyspen qamtý boıynsha — 24.

Qabyldanǵan sharalardyń nátıjesinde 34 myń jumyskerdiń eńbek quqyǵy qorǵaldy.

Budan buryn Eńbek mınıstrligi AÁK-ti proaktıvti taǵaıyndaýda JI-ni qoldanatynyn jazdyq.