Senator mektep psıhologtarynyń zańdy mártebesin kóterýdi usyndy

ASTANA. KAZINFORM — Qazaqstanda psıhologııalyq kómek kórsetý júıesi nashar damyǵan. Sondyqtan problemalar ýaqtyly anyqtalmaıdy jáne jastarǵa psıhologııalyq kómek tıisti deńgeıde kórsetilmeıdi. Búgin Senattyń jalpy otyrysynda depýtat Ǵalıasqar Sarybaev osy máseleni kóterdi.

Senatordyń pikirinshe, balalardyń psıhologııalyq jaǵdaıy men minez-qulqyndaǵy alǵashqy problemalar mektepke deıin jáne mektep jasynda anyqtalady.

Bul rette pedagog-psıhologtardyń oqýshylarǵa jeke dara qoldaý jasaýǵa qol jetkizý múmkindigi jáne onyń sapasyn arttyrý máselesine erekshe nazar aýdarý qajet.

Alaıda, bul salada birqatar problema bar.

«Orta eseppen 1,5 myń bala oqıtyn mektepte - 60, al 4500 jáne odan da kóp oqýshylary bar bilim oshaqtarynda - 170-ten kóp synyp bar. ıAǵnı, bir psıholog 2000 oqýshyǵa jáne erekshe bilim berýdi qajet etetin balalarǵa qyzmet kórsetip jatyr. Psıhologtyń úlken júktemesi bolýyna baılanysty naqty muqtaj adamǵa kómek berilmeı jatady», - dedi Ǵ. Sarybaev Premer-Mınıstr Oljas Bektenovtiń atyna joldaǵan saýalynda.

Senator máseleni sheshý úshin mektep psıhologtarynyń sany jónindegi normatıvti esepteýdi qaıta qaraýdy jáne oǵan synyp sanyna túzetýler engizýdi usynady.

«Resmı túrde 1987 jyly psıholog shtaty mektepterge engizilgenimen, olardyń zańdy mártebesi anyqtalmaǵan. Eńbekaqy tóleý júıesinde olar qosymsha mamandyq retinde aıqyndalǵan. Psıholog erekshe mamandyq ekenin eskere otyryp, negizgi mamandar tizbesine engizýdi oılastyrý qajet», - dedi depýtat.