Senator medkolledjderdiń bilim sapasyn synady
NUR-SULTAN. QazAqparat - Elimizdegi medıtsınalyq kolledjerdiń bilim berý sapasy tómen. Bul týraly búgin QR Densaýlyq saqtaý mınıstrliginiń alqa otyrysynda Senat depýtaty Serik Bekturǵanov aıtty, dep habarlaıdy QazAqparat tilshisi.
«2019 jyly elimizdegi 80 kolledjdiń 21 myńǵa jýyq túleginiń bilimine baǵalaý júrgizildi. Jalpy, elimizde medıtsına mamandaryn daıyndaıtyn 85 kolledj bar. Ortasha kórsetkish 75 balldy qurady. Bilimin dáleldeı almaǵandardyń úlesi 3 paıyz boldy. Eń tómen nátıjeni bir memlekettik jáne 27 jekemenshik kolledj kórsetti»,- dedi senator.
Máselen, onyń dereginshe, Almatydaǵy Márııam medıtsına kolledji túlekteriniń shamamen 80 paıyzy shekti baldy jınaı almaǵan. Ońtústik Qazaqstan medıtsına kolledji túlekteriniń - 41, Shymkenttegi Ortalyqazııalyq medıtsına kolledji túlekteriniń 38 paıyzy bilimderin dáleldeı almady. Buǵan qosa, bilimin rastaı almaǵan stýdentterge dıplom berý faktileri de kezdesedi.
«Tipti emtıhanǵa múldem kelmegenderge de dıplom berilgen. Al, bul óreskel zań buzýshylyq. Mundaı jaıttar orta kásibı medıtsınalyq bilim berý júıesindegi túsiniksiz jaǵdaıǵa baılanysty oryn alýda. Olar bilim berý júıesinen bilim berý qyzmetine lıtsenzııa alady. Al qalǵanynyń bárine oblystyq densaýlyq saqtaý basqarmalary jaýap berýi tıis. Jekemenshik medıtsınalyq kolledjder bolsa tipti, ókiletti organdar tarapynan, bilim berý salasynan da, densaýlyq saqtaý salasynan da baqylanbaıdy. Bul jaǵdaıdy tez arada ózgertý qajet», - dedi Serik Bekturǵanov.
