Senator maly urlanǵan turǵyndardyń qansha zııan shegetinin eseptedi
ASTANA. QazAqparat - Senattyń jalpy otyrysynda depýtat Vladımır Volkov el amýǵynda urlyq qylmystaryna tosqaýyl qoıýdyń qosymsha sharalaryn qabyldaýdy surady. Osy oraıda senator Úkimet basshysy Baqytjan Saǵyntaevtyń atyna tıisti depýtattyq saýaldy joldady, dep habarlaıdy QazAqparat.
«Páter tonaý, qalta urlyǵy, kólik pen bólshekterdi, túrli-tústi metaldar men mal urlaý, uıaly telefondardy jymqyrý sekildi áreketter qylmyskerler arasynda keńinen taralǵan. Bas prokýratýranyń málimetine súıensek, bıylǵy 8 aıda elimizde 202 myń qylmys pen qylmystyq áreketter tirkeldi. Onyń ishinde tek urlyqtyń ózi 120 myńǵa jetip otyr. Bul tirkelgen barlyq qylmystardyń 60 paıyzǵa jýyǵyn qamtýda», - dep toqtaldy depýtat.
Onyń sózine qaraǵanda, el halqyn páterdegi múlikti urlaý jaǵdaıy erekshe alańdatyp otyr. 2018 jyly páterge urlyqqa túsýge qatysty 23 myń fakti anyqtaldy.
«Bıyl 3 myń 468 mal urlyǵy bolǵan. Árbir urlyqtan keltirilgen zalal kólemi ortasha eseppen 200-300 myń teńgeni quraıdy. Aýyl turǵyny úshin jylqysyz, iri qara malsyz nemese túıesiz qalý qandaı qıyndyqtar týdyratynyn jaqsy túsinesizder», - dep toqtaldy senator.
V. Volkovtyń atap ótýinshe, aǵymdaǵy jyldyń 8 aıynda 434 avtokólik urlyǵy jáne avtobólshek urlaýdyń 5 637 faktisi tirkeldi. Sonymen birge, árbir ekinshi kólik tabylmaıtyn kórinedi.
Belgili bolǵandaı, bıyl 26 771 uıaly telefon urlanǵan. Onyń tek úshten bir bóligi ǵana tabylady eken.
«Bul turǵyda urlyqpen kúres boıynsha qosymsha zańnamalyq, uıymdastyrýshylyq, profılaktıkalyq, túsindirý jáne basqa da sharalardy qabyldaýdy suraımyn», - dedi V. Volkov Úkimet basshysyna joldaǵan depýtattyq saýalynda.
