Senator: mádenıet salasyn memlekettik damýdyń strategııalyq baǵyty retinde qaraý kerek
ASTANA. KAZINFORM – Senator Bıbigúl Jeksenbaı óziniń depýtattyq saýalynda mádenıet pen óner salasyn damytýdyń júıeli máselelerin kóterdi.
Astana qalasyndaǵy mádenıet uıymdarynyń ujymdary senatormen kezdesý barysynda dál osy túıtkilderdi alǵa tartqan bolatyn. Ózekti máselelerdiń qatarynda kadrlyq áleýet, tehnıkalyq jaǵdaı jáne sala qyzmetkerleriniń áleýmettik qorǵalmaýy bar.
Saýalda mádenıettiń eldiń rýhanı, zııatkerlik jáne halyqaralyq bedelin qalyptastyrýda sheshýshi ról atqaratyny basa aıtylǵan. Salanyń strategııalyq mańyzyna qaramastan, zamanaýı mamandyqtar men tehnıkalyq standarttardy engizýden bastap, ınklıýzııa jáne jekelegen shyǵarmashylyq mamandyq ıelerine arnalǵan áleýmettik kepildikterge deıingi birqatar baǵyt ınstıtýtsıonaldyq deńgeıde jetkilikti rettelmeı otyr.
«Osyǵan baılanysty mádenıet salasyn qosalqy baǵyt emes, ornyqty memlekettik damýdyń ózegi retinde qarastyrý qajet. Sala ókilderimen kezdesýlerde birqatar másele anyqtaldy. Qazirgi ýaqytta mádenıet salasynda tsıfrlyq kontent prodıýserleri, sahnalyq tsıfrlyq tehnologııalar ınjenerleri, ınklıýzıvti mádenıet mamandary, mádenı derekter taldaýshylary sııaqty jańa zamanaýı mamandyqtar zańnamalyq deńgeıde bekitilmegen. Astana qalasyndaǵy birqatar teatrda, kontserttik uıymdar men fılarmonııalarda sahnalyq jaryqtandyrý jáne dybys júıeleri eskirgen, tsıfrlyq translıatsııa men muraǵattaý múmkindikteri shekteýli. Múgedektigi bar azamattardyń ónerge qatysýy, ınklıýzıvti teatrlar men shyǵarmashylyq stýdııalardy damytý isi negizinen jekelegen bastamalar deńgeıinde qalyp otyr, olar júıeli memlekettik saıasatpen jáne turaqty qarjylandyrýmen qamtamasyz etilmegen. Balet jáne tsırk óneriniń ókilderi áleýmettik jáne kásibı turǵydan qorǵalmaǵan kúıde qalyp otyr. Sondaı-aq dırıjerlerdiń quqyqtyq mártebesi, áleýmettik kepildikteri men kásibı damý máseleleri de tolyq rettelmegen», - dedi Bıbıgúl Jeksenbaı.
Osyǵan baılanysty depýtat Úkimet deńgeıinde birqatar ınstıtýtsıonaldyq sheshimderdi qarastyrýdy usyndy. Onyń ishinde zamanaýı mádenı jáne tsıfrlyq mamandyqtardy zańnamalyq turǵyda bekitý, dırıjerler úshin quqyqtyq jáne áleýmettik kepildikter ornatý, mádenıet uıymdaryna arnalǵan eń tómengi ulttyq tehnıkalyq standarttardy engizý bar. Sondaı-aq turaqty qarjylandyrý negizinde ınklıýzıvti mádenı ortany damytý, balet jáne tsırk óneriniń ókilderi úshin arnaıy áleýmettik qorǵaý sharalaryn qabyldaý men olardy kásibı qaıta daıarlaý máseleleri de usynystar qataryna endi.
Aıta keteıik, Ulttyq quryltaıdyń V otyrysynda Memleket basshysy Qasym-Jomart Toqaev ónerimiz ben mádenıetimizdi órkendetý úshin áli kóp jumys istelýi tıis ekenin aıtty.