Senator M.Muhamedov Qazaqstanda temeki men spırttik ishimdikterdiń aktsızdik stavkalaryn kóterýdi usyndy
ASTANA. 11 qańtar. QazAqparat /Qanat Mámetqazyuly/ - Ult bolashaǵy úshin Qazaqstanda temeki men spırttik ishimdikterdiń aktsızdik stavkalaryn kóteretin ýaqyt jetti.
Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Murat Muhamedov osylaı málimdedi.
Senatordyń aıtýynsha, resmı derekter sońǵy on jylda elimizde maskúnemder sany on esege óskendigin aıǵaqtaıdy. Máselen, elimizdegi narkologııalyq mekemelderde 235 416 adam maskúnemdik derti boıynsha esepte tur. Bul Qazaqstandaǵy árbir 100 myń adamnyń 144,2-si maskúnemdikke boı aldyrǵandyǵyn bildiredi.
«Respýblıka boıynsha 1 adamǵa shaqqanda jylyna orta eseppen 31 lıtr syra, 12 lıtr araq shyǵarylady eken. Taǵy bir derek mynany aıtady: el turǵyndarynyń 33,3 paıyzy, ıaǵnı 1/3 araq ishedi, solardyń 59,7 paıyzy 20 jasqa deıingi jastar men jasóspirimder. Dúnıejúzilik densaýlyq saqtaý uıymy sarapshylarynyń pikirinshe, jylyna jan basyna shaqqanda ishimdik 8 lıtrden assa ult genofonyna áser etedi. Al, bizdegi bul kórsetkish 12 lıtrge jetip otyr. Bul degenińiz ulttyń azyp-tozýyna, onyń tamyryna balta shabýǵa jol berip otyrǵandyǵymyz emes pe?», - deıdi M. Muhamedov.
Bul rette depýtat, Elbasynyń bastamasymen «Salamatty Qazaqstan» baǵdarlamasy jasalyp, ony júzege asyrý úshin arnaıy qarjy da bólingenin aıta kele, ókinishke qaraı, olardyń salamatty ómir saltyn qalyptastyrýdaǵy tıimdiligi sezilmeı otyrǵanyn da tilge tıek etti. Munyń bir sebebi, qazaqstandyq naryqtaǵy temeki men spırttik ishimdik ónimderiniń baǵasy óte tómen.
«Evropa elderin aıtpaǵannyń ózinde, Keden odaǵyna engen memleketterdiń arasynda Qazaqstanda 2012 jylǵy aqtsızdeletin taýarlarynyń eń tómengi aktsızdik stavkalary qalyptasqan. Mysaly, 1 lıtr araqtyń aktsızdik stavkesi Reseıde - 1024,8 teńge, Belarýsııada-- 941,5 teńge, al Qazaqstanda 500 teńge, ıaǵnı eki ese tómen. Al endi, 1 lıtr syranyń baǵasy - Reseıde 53 teńge, Belorýssııada 30,5 teńge, Qazaqstanda 26 teńge ǵana. Sondyqtan da, Qazaqstan Birtutas ekonomıkalyq aımaqqa, Kedendik odaqqa engen osy tusta, temeki men spırttik ishimdikterdiń aqtsızdik stavkalaryn kóteretin ýaqyt jetti dep sanaımyz. Bul ózimizdiń búginimiz ben bolashaǵymyz úshin asa mańyzdy sharalardyń biri», - dedi senator M. Muhamedov.
