Senator M. Altynbaev «Baıqońyr» aılaǵynyń bolashaǵyna alańdady
Eske salaıyq, otyrysta Qazaqstan men Reseıdiń «Baıqońyr» ǵarysh aılaǵynda apattar bolǵan jaǵdaıdaǵy ózara is-qımyl tártibi týraly kelisimge ózgerister engizý týraly Hattama qabyldanǵan bolatyn.
«Qujatty komıtette talqylaý barysynda biz «Baıqońyrdyń» bolashaǵyna qatysty suraq qoıǵan edik. Óıtkeni, qazirgi tańda Reseı ózderiniń «Vostochnyı» aılaǵyn salýdy aıaqtap keledi. Bul - olar úshin asa qymbat joba, degenmen, birtindep olar ushyrýdy sol jerden ótkize beretinge uqsaıdy. Osyǵan qatysty biz qazaqstandyq aılaqtyń bolashaǵy jóninde qandaı jumystar júrgizilip jatqanyn suraǵan edik. Alaıda mardymdy jaýap ala almadyq»,- dedi depýtat.
Sonymen qatar, senator «Baıqońyr» aılaǵy aıasynda «Qazǵarysh» baǵdarlamasy boıynsha qyrýar qarajat bólinip jatqanyn aıtyp, alaıda bolashaq mártebege qatysty naqty jaýaptar bolmaı otyrǵanyn atap ótti.
«Qazir ýaqyt bar, biz baǵytymyzdy aıqyndaýymyz kerek. Biz mamandarymyzdan «Baıqońyrdyń» bolashaǵy qalaı degen saýalǵa naqty jaýap kútemiz. Bul jeńil-jelpi qaraıtyn másele emes, jobanyń ózi qymbat. Qajet bolsa bunda halyqaralyq deńgeıdegi Qazaqstannyń ustanymyn da anyqtaý kerek», - dedi M. Altynbaev.