Senator Lázzat Súleımen Almaty oblysyndaǵy aýyl turǵyndarymen kezdesti

NUR-SULTAN. QazAqparat - Parlament Senatynyń depýtaty Lázzat Súleımenniń Almaty oblysy, Aqsý aýdanyndaǵy Qapal jáne Qyzylaǵash aýyldarynyń turǵyndarymen kezdesýi kezinde sýarý júıesin salý, jaıylym tapshylyǵy jáne dárigerlerdiń jetispeıtini negizgi máselelerdiń biri boldy, dep habarlaıdy QazAqparat.

QR Parlamenti Senaty baspasóz qyzmetiniń málimetterine qaraǵanda, depýtat kezdesý barysynda aıtylǵan problemalardy sheshýge mańyz bere otyryp, olardy óz baqylaýyna alatynyn atap ótti. Senator sonymen qatar aýdan basshylyǵy ózekti máselelerdi sheshýdiń barlyq múmkin joldaryn qarastyrýy jáne azamattardyń muń-muqtajyna nazar aýdarýy tıis ekenin atap ótti.

Kezdesýge qatysýshylar elimiz Prezıdentiniń Qazaqstan halqyna Joldaýynda aıtylǵan negizgi reformalardy da egjeı-tegjeıli talqylady. Aýyl turǵyndary men Lázzat Súleımen Memleket basshysynyń osy Joldaýynda alǵa qoıylǵan basymdyqtar týraly óz pikirlerimen bólisti.

«Qazir naqty saıasat júrgizetin ýaqyt. Bos áńgime, sózbuıdaǵa salý, bir kezdesip, ketip qalatyn zaman artta qalýy tıis, óıtkeni eski formatpen «Jańa Qazaqstannyń» qurylýy múmkin emes. Depýtattar halyq qoıǵan máselelerdi sheshýde muqııat bolý, tabandylyq tanytý, júıeli baqylaýdy jolǵa qoıýy tıis», - dedi Lázzat Súleımen.