Senator: Latyn grafıkasynda jazý áldeqaıda ońaı

ASTANA. QazAqparat - Qazaq álipbıin latyn grafıkasyna kezeń-kezeńimen jáne júıeli túrde kóshirý arqyly ony meńgerý qıyndyq týdyrmaıdy. Mundaı pikirdi Senattyń Ekonomıkalyq saıasat, ınnovatsııalyq damý jáne kásipkerlik komıtetiniń tóraǵasy Asqar Beısenbaev bildirdi, dep habarlaıdy QazAqparat.

«Bul taqyryp burynnan kóterilip kele jatqanyn bilesizder.  Osy oraıda bastamaǵa qazaqstandyqtar tarapynan qoldaý bildirilýde, sonymen qatar ózim de bul qadamdy qoldaımyn. Negizi, latyn grafıkasynda jazý tájirıbesi bizde buryn bolǵan. Atap aıtqanda, qazaq tili álipbıiniń latyn grafıkasyndaǵy nusqasy tilimizdiń bolmysyna jaqyn dep esepteımin», - dep toqtaldy senator.

Osy oraıda A. Beısenbaev búginde jastar úshin latyn grafıkasynda jazý múldem qıyndyq týdyrmaıtynyn atap ótti.

«Al endi úlken býyndaǵy azamattarmen jumys isteý kerek bolady. Meniń oıymsha, bul máselede tıisti sheshim jasalady. Sebebi bul baǵytta kezeń-kezeńmen ótý sharalary eskerilip otyr. Elbasy qazaq tili álipbıin kırıllıtsadan latyn grafıkasyna kóshirý týraly Jarlyqqa qol qoıdy. Jalpy, bul der kezinde jasalyp otyrǵan sheshim», - dedi depýtat.

Onyń paıymynsha, sońǵy tanystyrylǵan álipbı nusqasy pysyqtalyp jasalǵan, sondyqtan ony meńgerý qıyndyq týdyra qoımaıdy.

«Negizi, mátindi latyn qarpinde jazýdy burynnan paıdalanyp kelemin. Óıkeni uıaly telefonda SMS-ti kırıllıtsamen jazǵanǵa qaraǵanda, latyn grafıkasynda jazǵan áldeqaıda ońaı», - deıdi Asqar Asanuly.

Esterińizge sala keteıik, Qazaqstan Respýblıkasynyń Prezıdenti Nursultan Nazarbaev qazaq tili álipbıin kırıllıtsadan latyn grafıkasyna kóshirý týraly Jarlyqqa qol qoıdy .