Senator L. Turlashovtyń ókilettigi toqtatyldy
ASTANA. QazAqparat - Búgin Parlament Senatynyń jalpy otyrysynda palata depýtattary senator Lazzat Mahatuly Turlashovtyń ókilettigin toqtatý týraly qaýly qabyldady. Konstıtýtsııaǵa sáıkes, depýtattyq ókilettikti toqtatý týraly másele palatanyń derbes qaraýyna jatady.
Atalǵan sheshim depýtattyń basqa jumysyna aýysýyna baılanysty qabyldanyp otyr. Eske sala keteıik, jaqynda Almaty oblysy ákiminiń ókimimen Lázzat Mahatuly Turlashov oblys ákiminiń birinshi orynbasary bolyp taǵaıyndalǵan bolatyn.
L. Turlashov 1960 jyly týǵan. Almaty temir jol transporty ınjenerleri ınstıtýtyn qurylys ınjeneri mamandyǵy boıynsha bitirgen. Eńbek jolyn Qaskeleń aýdany «Jetisý» keńsharynda qurylys tsehynyń jumysshysy bolyp bastaǵan. Ár jyldarda brıgadır, sheber, bas prorab, qurylys ýchaskesiniń bastyǵy, kooperatıv tóraǵasy, «Almatyagrohım» AQ bólim bastyǵy, Talǵar aýdany «Krasnoe pole», «Gornyı sadovod», «Gúldala» aýyldyq okrýgteriniń ákimi, Qarasaı aýdany ákiminiń orynbasary, Jambyl, Qarasaı aýdandarynyń ákimi qyzmetterin atqarǵan.
2011 jyldyń tamyz aıynan - Qazaqstan Respýblıkasy Parlamenti Senatynyń depýtaty.
Áriptesteri L. Turlashovtyń jańa qyzmetine tabys tiledi.
