Senator qurylysy keıinge shegerilgen ýnıversıtet jataqhanasy máselesin kóterdi
«2018 jylǵy 5 naýryzda Elbasy «Prezıdenttiń bes áleýmettik bastamasy» atty halyqqa úndeýinde stýdentterdiń jaǵdaıyn jaqsartýǵa, onyń ishinde 2022 jyldyń sońyna deıin elimizde 75 myń stýdentke jataqhana salý týraly tapsyrma bergen bolatyn. Bilim jáne ǵylym mınıstrliginiń málimetine sáıkes, búgingi tańda elimizdiń 81 myń stýdenti jataqhanaǵa zárý bolyp otyr. Osy oraıda aǵymdaǵy jyldyń 18 jeltoqsanda «Vremıa» gazetinde ál-Farabı atyndaǵy Qazaq ulttyq ýnıversıtetine qatysty jarııalanǵan «Proektno-smetnaıa mıstıfıkatsııa» maqalasy bizdiń depýtattyq saýalymyzǵa túrtki boldy. Gazette jarııalanǵan málimetterge súıensek, osydan jeti jyl buryn Ýnıversıtet jataqhanalar, medıtsınalyq ortalyq, sondaı-aq ınnovatsııalyq klasterdiń qurylysyna jobalyq smetalyq qujat ázirleýge 6 mıllıon dollardan astam bıýdjet qarajatyn jumsaǵan. Maqalada nysandar áli kúnge deıin salynbaǵany aıtylǵan», - dep toqtaldy senator.
Belgili bolǵandaı, bólingen qarajatqa jataqhananyń qurylysyna jobalyq smetalyq qujat ázirleý merzimi 2011 jyldyń shilde aıynan bastap 2016 jyldyń shilde aıyna deıin 12 ret sozylǵan. Sonymen birge, medıtsınalyq ortalyqtyń qurylysynyń jobalyq smetalyq qujat ázirleý merzimderi 2016 jyldyń maýsymyna deıin birneshe ret keıinge qaldyrylǵan.
«Tenderlerdi utyp alǵan eki kompanııanyńda bir mekenjaıǵa, ıaǵnı Óskemen qalasy Sátpaev kóshesi, 29/2 úıge tirkelgeni kúdik uıalatady. Sonymen birge, Ýnıversıtettiń janyndaǵy ınnovatsııalyq klasterdiń jobalyq smetalyq qujatyn ázirleý alty ret keıinge qaldyryp, merzimi 2016 jylǵa deıin sozylyp otyrylǵan. Qurmetti Ǵızat Dáýrenbekuly, joǵaryda aıtylǵandardyń negizinde osy másele boıynsha zańnamada belgilengen tártipte tıisti is-sharalar qarastyrýdy suraımyz», - dedi NarımanTóreǵalıev.
