Senator koýchtar jaıynda: solardyń kesirinen qanshama shańyraq shaıqaldy
ASTANA. KAZINFORM – Qazirgi kezde psıhologtar men koých qyzmetin kórsetetinderdiń is-qımylyn baqylaýdyń joqtyǵy ótkir sezilip otyr. Bul týraly senator Amangeldi Esbaı málim etti.
Depýtattyń aıtýynsha, psıhologııalyq kómek salasynda tıisti zańnamalyq jáne kásibı baqylaýdyń bolmaýyna baılanysty salalyq bilimi men biliktiligi joq adamdar kóbeıdi. Bul rette, ózderin psıholog nemese koých dep atap, emin-erkin jumys istep jatyr. Mundaı «mamandardyń» kesirinen jeke ómirge aralasýy, qupııa aqparattyń taralýy, emotsıonaldyq jáne otbasylyq kúızelis sııaqty máseleler oryn alǵan. Ásirese, qysqa merzimdi kýrstar uıymdastyratyn jáne ony bitirgennen keıin qatysýshylarǵa sertıfıkat beretin toptar erekshe alańdatyp otyr.
Senator olardyń jumys ádisiniń ǵylymı negizine kúmán keltirdi jáne olardyń dástúrli otbasylyq qundylyqtarǵa qaıshy keletindigin atap ótti. Sonymen qatar, olardyń keıbireýleri dinı senim qaǵıdalaryn ózinshe joramaldap, jalǵan túsinik qalyptastyrady jáne erli-zaıyptylar arasyndaǵy kelispeýshilik týǵyzyp jatyr.
- Mysaly, otbasylyq keńes berýdi syltaýratyp, «jubaıyńyzdy qalaı ózgertýge bolady», «balany basqarý ádisteri», «ajyrasý – jańa ómirdiń basy» sekildi radıkaldy kózqarasty nasıhattaýshy «mamandardyń» áserinen aırandaı uıyp otyrǵan qanshama otbasynyń shyńyraǵy shaıqaldy. Kóptegen jaǵdaıda bala tárbıesine qatysty teris nusqaýlar berilip, emotsııalyq zorlyq-zombylyq elementteri keńes formasynda usynylady. Mundaı keńesterdiń nátıjesinde ata-analar men balalar arasynda senim joǵalyp, otbasylyq qarym-qatynasqa nuqsan kelýi jıilep keledi. Sonymen qatar, «bıznes bastaımyz», «qarjylyq erkindikke jeteleımiz», «sanany baǵdarlamalaý arqyly mıllıoner bolasyń» degen uranmen jalǵan koýchtar azamattardy nesıe alýǵa ıtermeleýde. Osynyń saldarynan kóptegen adam qarjylyq kúızeliske ushyrap, qaryzǵa batyp, jeke ómiri men otbasyna keri áserin tıgizip jatyr. Aǵymdaǵy jaǵdaı jáne negizgi máselelerge toqtalsaq, Qazaqstanda jeke praktıkamen aınalysatyn psıhologtar men koýcherlerdiń naqty sany belgisiz, sebebi biryńǵaı tirkeý nemese lıtsenzııalaý júıesi joq, - dedi Amangeldi Esbaı Úkimet basshysynyń atyna joldaǵan depýtattyq saýalynda.
Osy oraıda ol «psıholog» nemese «koých» ataýyn mamandyqqa sáıkes kelmeıtin, qysqa merzimdi kýrstan ótken adamdar da erkin paıdalanyp jatqanyn aıtty. Qupııalyqty saqtaý, klıentke zııan keltirý, emotsıonaldyq manıpýlıatsııa jasaý sekildi teris tájirıbelerge qatysty naqty jaýapkershilik tetikteri belgilenbegen.
- Zań qabyldaýdy, lıtsenzııalaý jáne kásibı tirkeý tetigin engizýdi, psıhologtar men koýchterdiń biryńǵaı ulttyq reestrin qurýdy, sondaı-aq Etıkalyq kodeks jáne qupııalylyqty saqtaý talaptaryn zańdastyrý arqyly klıenttiń jeke derekterin qorǵaý, aqparatty ruqsatsyz jarııalamaý mindetterin quqyqtyq jaýapkershilikpen bekitýdi usynamyz, - dedi senator.
Eske salsaq, jaqynda Májilis depýtaty Aıdos Sarym ezoterıkter men trener-koýchterdi synǵa aldy.