Senator qosymsha bilim berý týraly aıtty
ASTANA. QazAqparat - Parlament Senatynyń depýtaty, QR Bala quqyqtary jónindegi ýákil Sáýle Aıtpaeva Petropavlda balalarǵa qosymsha bilim berý júıesin saqtaý jáne damytý máseleleri jónindegi tıimdi únqatysýdyń ashyq alańynda bolǵan qurylymdyq suhbatqa qatysty, dep habarlaıdy QazAqparat Senattyń baspasóz qyzmetine silteme jasap.
Respýblıka boıynsha qosymsha bilim alatyn balalardyń jalpy sany 82,8% (2 639 074 adam) bolyp otyr. 1303 mektepten tys uıymdar men mektepterde 63 myńnan astam úıirme jumys istep keledi. 70 myńǵa jýyq ustaz mektepten tys mekemelerde (mektepten tys uıymdarda 19 myńnan astam jáne mektepterde 50 myńnan astam pedagog) qyzmet atqarady.
Elbasynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýyn oryndaý maqsatynda 2018 jyly aımaqtarda qosymsha bilim beretin túrli uıymdardyń negizinde 60 myńnan astam oqýshyny qamtyp otyrǵan 17 tehnopark pen 16 bıznes-ınkýbatorlar quryldy. Bul maqsatta 2,4 mlrd teńge bólingen bolatyn. 2019 jyly 120 myń oqýshyny qamtıtyn elimizdiń barlyq óńirlerinde 25 balalar tehnoparki men 18 bıznes-ınkýbator qyzmet kórsetetin bolady.
Respýblıkada balalarǵa qosymsha bilim berý jónindegi qajetti zańnamalyq jáne normatıvtik quqyqtyq baza quryldy. 2019 jyldyń aqpan aıynda Qazaqstan Respýblıkasynda balalarǵa qosymsha bilim berýdi damytýdyń tujyrymdamalyq tásilderi, balalar mýzyka, kórkemóner jáne óner mektepterine arnalǵan 85 bilim berý baǵdarlamasy bekitildi.
Bala quqyqtary jónindegi ýákil S.Aıtpaevamen birge sharaǵa bilim jáne ǵylym mınıstrliginiń, Balalarǵa qosymsha bilim berý jónindegi Eýrazııalyq qaýymdastyqtyń, jergilikti atqarýshy organdardyń, Ulttyq kásipkerler palatasynyń, «Nur Otan» partııasynyń, ıÝNESKO-nyń Qazaqstandaǵy klasterlik bıýrosynyń ókilderi, mektep jáne mektepten tys uıymdar men úkimettik emes uıymdardyń jetekshileri, ata-analar qaýymy qatysty.
Qurylymdanǵan únqatysý jumystarynyń barysynda balalardy oqytýǵa qazirgi zamanǵy mýltımedııalyq jáne tsıfrlyq tehnologııalardy qoldaný jaıy saralandy. Sondaı-aq, tehnıka men bıznes baǵyttaryna ınnovatsııalyq modelder engizý, jalpy orta jáne qosymsha bilim berýdi kiriktirýdiń túrli sıpattary, STEM bilimin damytý jáne taǵy basqa máseleler talqylandy.
Forým aıasynda Petropavl qalasyndaǵy Oqýshylar saraıy tanystyryldy jáne Win-win strategııasyn, erekshe bilim alý qajettilikterine muqtaj balalardy oqytýdaǵy ınnovatsııalar, mektepke deıingi jastaǵy balalarǵa arnalǵan robototehnıka, sýret ónerinde IT-tehnologııalardy qoldaný boıynsha 10 sheberlik synyby ótkizildi.
Senator S.Aıtpaeva balalarǵa qosymsha bilim berýdegi keleshek basym baǵyttardy anyqtaıtyn qorytyndy usynymdardy berýge belsendi qatysty.
