Senator «Qorǵas» shekara mańy ortalyǵy jumysyndaǵy máseleni aıtty

ASTANA. KAZINFORM – Senator Súıindik Aldashev «Qorǵas» shekara mańy klasteriniń jumysyndaǵy problemalar týraly pikir bildirdi.

Búgin Senattyń jalpy otyrysynda Úkimet basshysynyń atyna joldaǵan depýtattyq saýalda ınfraqurylymdyq shekteýler, otandyq tasymaldaýshylar úshin teń emes jaǵdaılar jáne ákimshilik kedergiler jaıyn aıtyldy.

Depýtat óz saýalynda búginde «Qorǵas» «Nurly jol» jáne «Bir beldeý - bir jol» baǵdarlamalary aıasynda halyqaralyq kólik dálizderiniń damýyn qamtamasyz etetin Qazaqstannyń tranzıttik ınfraqurylymyndaǵy strategııalyq mańyzdy toraptardyń biri ekenin atap ótti. 2025 jyldyń qorytyndysy boıynsha Qazaqstan men Qytaı arasyndaǵy júk tasymalynyń kólemi rekordtyq 30 mln tonnany qurady.

Sonymen qatar, senator oń dınamıkaǵa qaramastan, Senat depýtattarynyń kóshpeli otyrysy barysynda bul baǵyttyń damýyn tejep otyrǵan júıeli máseleler anyqtalǵanyn qadap aıtty.

- Qorǵas qalasynda Qazaqstan Respýblıkasynyń konsýldyǵynyń bólimshesin ornalastyrý, úkimetaralyq deńgeıde qazaqstandyq júrgizýshilerge shekarany júkpen de, onsyz da erkin kesip ótý quqyǵyn berý máselesin pysyqtaý qajet. «Qorǵas» shekara mańy yntymaqtastyǵy halyqaralyq ortalyǵyn memlekettik shekara arqyly ótkizý pýnktteriniń tizbesine engizý máselesin qarastyrý jáne Qazaqstan men Qytaıdyń arnaıy ekonomıkalyq aımaqtary arasynda tikeleı temirjol jáne avtojol salý jobasyna bastama jasaý qajet. Bul kólik aǵyndaryn qaıta baǵyttaýǵa jáne júktemeni azaıtýǵa múmkindik beredi», - dedi Súıindik Aldashev.

Sondaı-aq depýtat atalǵan máselelerdi sheshý eldiń tranzıttik áleýetin arttyrýǵa, otandyq tasymaldaýshylar úshin teń jaǵdaıdy qamtamasyz etýge jáne Qazaqstannyń aımaqtaǵy negizgi logıstıkalyq hab retindegi ustanymyn nyǵaıtýǵa múmkindik beretinin basa aıtty.

Budan buryn habarlanǵandaı, «Qorǵas» jáne «Alashankoý» shekaralyq toraptaryn jańǵyrtý boıynsha kelisimder jasaldy.